​​​

​

Oundu wetu u munika mu Kristus erike. ²¹Ndjambi ongwe tu zikamisa pamwe na eṋe mu Kristus. Ndjambi omuini we ri toororera eṱe, ²²nu wa twako otjihako tjouini we ku eṱe ne tu pe Ombepo Ondjapuke momitima vyetu otja otjiyambo tji ma tji raisa kutja eṱe oweṱe ove erike (2 Ovakorinte 1:21-22).

 

Owete ovanatje va Muhona. ¹Tareye orusuvero Tate ndwe tu suvera na ro! Orusuvero rwe orunene tjinene, nga tjime tu isana kutja oweṱe ovanatje va Ndjambi, nu wina otjinga atu ri nao. Ouye opu u ha zu okututjiwa, tjinga au he i Ndjambi (1 Johanes 3:1). Mukuru we tu toorora, nu ongutukiro iza mu Ndjambi. Ete katu yamenwe poo okutoorwa mena rokutja owete ovasemba, omo tjimbe tjotjari tja Ndjambi omuharupu ngu yandja onguturiro. Mu nao, katu na okusokurihiva poo okuritongamisa. Oviungura vyongutukiro vya ri mouripura wa Mukuru ngunda ete atu hi ya karako. Omundu mo zuu ouzeu kutja Mukuru we tu yakura, posiya mena ra Kristus owete ovayapuke novehinandjo momeho We. ⁴Ouye ngunda au hiya utwa, Ndjambi wetu toororera okurira ove mu Kristus kokutja tu rire ovayapuke novehinandjo komurungu we Ovaefese 1:4).

 

Ete owete ovayapuke vapeke. Ete matu sokukara tjimuna Tate Ndjambi- ovayapuke mu ngamwa atjihe tji matu ungura. Ouyapuke mape hee kutja ete twa sokuriyandja atuhe ku Ndjambi, mokuungurisiwa kwapeke, nokuripora komauvi kutja atu ha pukisiwa. Ete kawete orupa rotjimbumba kaani nu  katu sokuhanika oumune nandarire kutja katu na oumune umwe. ¹⁵Rireye ovayapuke mu avihe mbi ma mu tjiti, Ndjambi ngwe mu isana tjinga e ri omuyapuke. ¹⁶Omatjangwa maye tja: “Rireye ovayapuke, ami tjinga ambi ri omuyapuke” (1 Petrus 1:15-16). 

 

Indu ndoovazu onduri yetu okuyandja ondangu  ku  Muhona korusuvero Rwe, omasa nomeurisiro mu avihe  mbi  matu tjiti, matu mu karere osemba. Okukarera Ndjambi ku wanisa ovakambure avehe  nokuvetjita  kutja ve suverasane nokukara nakonatja  ku varwe. Kape na umwe wetu ngu ma yenene okuurisiwa mokusana ku Kristu mourike we – opo pekambura okanepo korutu rwa Kristu aruhe okuyarisa  Kristu moumbomba we.  Ete tji matu ungura nu atu kara nombango okutunga ovakambure varwe, ovakriste mave yenene okuzuvakwa moukarenpo wa Muhona.

 

Okuhanganisiwa na Muhona mape hee kutja wina okuhanganisiwa ku na varwe.  Pe na omuano umwe uriri okuhanganisiwa ku na Muhona: Kristu wetu hanganisa  ku na Muhona  indu tji twa rira vemwe mu Ye. Ovajuda na imba mbe he  ri Ovajuda avehe mave yenene okukara nondjo youtongatima – ovaJuda mokunangarasi  ovitjitwa vyawo  ombu ri ovisemba kombanda ya imba ovarwe,  na imba mbe he ri Ovajuda mokuzemba okuhina omaundjiro wavo muKristu. Omutongatima wopombambepo u tu tjita kutja atu ha munu ozondataiziro zetu  nungwari tu mune  inda zovandu  varwe.  Takamisee kutja amu  ha kara nomutongatima kondjamo ndji mwa muna mu Kristu. Nungwari tangee Muhona Mukuru nokurisusuparisa mu imbi Eye mbye mu tjitira  nu zeuparisee varwe mbe tenduna mongamburiro yawo. oNamibia orutu rumwe, ovaJuda na imba mbe he ri ovaJuda va  hanganena mu Kristu. ¹²Momayuva ngo eṋe mwa ri kokure na Kristus. Eṋe mwa ri ovozonganda nu kamwa ri owotjiwaṋa otjitoororwa tja Ndjambi. Eṋe ka mwa ri norupa momerikutiro pamwe na momakwizikiro wawo, nu mwa kara nokuhina omaundjiro nokuhina Ndjambi mouye. ¹³Nungwari nambano moruwano na Kristus Jesus eṋe mbu mwa ri kokure mwa kotorwa popezu i ombinḓu ya Kristus. ¹⁶Nu monḓiro ye kotjikoroise eye wa yandisa ovita pokati komihoko vivari mbi, e vi hanganisa na Ndjambi ne vi wanisa avi rire orutu rumwe Ovaefese 2:12-13 & 16).

 

¹²Orutu romundu ru na ouṋepo ouingi, nungwari ouṋepo ouingi mbwi, owo uri korutu rumwe. Notjinga ape ri nao wina norutu rwa Kristus, okutja oyo ndji ombongo ye. ¹³Nu momuhingo otjingewo eṱe atuhe, kutja oweṱe Ovajuda poo kaweṱe Ovajuda, kutja oweṱe ovakarere poo ovakutuke, twa papitisiwa morutu rumwe i Ombepo otjingeyo, neṱe atuhe twa pewa Ombepo imwe momitima vyetu. ¹⁴Orutu oruini orwo kakaṋepo kemwe uriri, nungwari orwo ru nouṋepo ouingi. ¹⁵Ndakuzu ombaze mai tja: “Ami tjinga ambi he ri eke, otjinga ambi he ri okaṋepo korutu,” indu oyo mai isa okurira okaṋepo korutu are? ¹⁶Ndakuzu okutwi maku tja: “Ami tjinga ambi he ri eho, otjinga ambi he ri okaṋepo korutu,” indu oko maku isa okurira okaṋepo korutu are? ¹⁷Orutu aruhe andakuzu orwo eho, itjaru sora vi okuzuva? Norwo andakuzu okutwi porwako, itjaru sora vi okuṋuka? ¹⁸Nungwari nambano Ndjambi wa twa mo ouṋepo morutu, akehe peke, otja punga a vanga. ¹⁹Nu auhe andakuzu okaṋepo kemwe uriri, indwi orutu itjaru kara vi? ²⁰Nu nambano pe nouṋepo ouingi, nungwari indwi orutu irumwe. ²¹Neho kari nokusora okutja keke: “Hi nakukuhepa!” Nu wina otjiuru katji nokusora okutja kozombaze: “Ami hi nakuhepa eṋe!” ²²Nu tjinene ouṋepo mbwi worutu mbu ri aayo oungundi tjinene, ombu ri ounahepero. ²³Nouṋepo mbwi mbu tu tjangovasi owo kau nonḓengu tjinene komeho, owo ombu tu zareka tjinene; nu imbwi mbu ha munika nawa, ombu tu ṱuna nawa tjinene, ²⁴imbwi ouṋepo mbu munika nawa ngunda au ha hepa okuṱunwa nawa. Ndjambi omuini wa twa kumwe orutu nai, okutja a yandje ondatero tjinene komeho kouṋepo mbwi mbu mau i hepa. ²⁵Orondu Ndjambi ka vangere kutja pe kare ohaṋikiro morutu, nungwari wa vanga kutja ouṋepo auhe u rikenderasane. ²⁶Okaṋepo kemwe tji make hihamwa, ouṋepo auhe oukwao wina mau hihamwa pamwe na ko; nokaṋepo kemwe tji ka yozikwa, ouṋepo auhe oukwao mau nyanda pamwe na ko. ²⁷Eṋe amuhe oweṋe orutu rwa Kristus, nu auhe peke eye okaṋepo korutu ndwi (1 Ovakorinte 12:12-27).

 

Otja ovakumbure, tu sokurwisa omunavita ingwi ngu matu tjiwa, nu atu ha rwisasana oveni. Tji tu ri tu vemwe morusuvero, matu kara nondjiviro momasa wa Kristus. Aruhe ngatu yandje ombango komaunguriro wa kumwe nokuhina omutongatima. Ngatu siririke omeho wetu mu Kristus.

 

Ete tji twa pendurwa pu na Kristu, twa rira ovature vouhona weyuru. ²⁰Nungwari eha retu ri ri meyuru, nu matu undju omukuture wetu Jesus Kristus oMuhona, a rauke keyuru. ²¹Eye ma tanaura otutu twetu otungundi notukoke kutja tu sane nomuhapo worutu rwe orunandjozikiro, tjinga e nomasa okuwisa oviṋa avihe kehi youhonapare we (Ovafilipi 3:20-21). ¹Tji twe kurisiwa mu Kristus matu rire ovature meyuru. Nu tjinga a mwa pendurwa pamwe na Kristus, otjinga ama mu sokupaha imbi vyokombanda ku ku na Kristus ngu ri pehi kokunene kwa Ndjambi. ²Zemburukeye imbi vyokombanda, nu a ha rire imbi vyokombanda yehi (Ovakolose 3:1-2).

 

Otja ovandu ovape, mu Muhona  mbu twa wanisiwa mu  Jesus Kristu, owete ovature wouhona wa Ndjambi nu ounepo wondjuwo Ye.  Otjomuture  wouhona ove mo sokuritizira mouvara wa Muhona na imbi mbi ma hungire membo  Re.  Kape nakunatja kutja oove omuture wehi rine, tji u ri omuatje wa Muhona oove omuture wouhona we. ¹⁹Neṋe kaweṋe owozonganda novambangu rukwao; nambano oweṋe oworuuto rumwe notjiwaṋa tja Ndjambi nouṋepo wonganda ya Ndjambi. ²⁰Eṋe mwa tungwa kombanda yomazikameno wovaapostele novaprofete, nu Kristus Jesus omuini e ri ngu ri indji ongunḓe yomatungiro. ²¹Eye ongu ṱizira inga omatungiro aehe kumwe, nu mu ye owo ye hapa okurira ondjuwo ondjapuke mu Muhona. ²²Nu moruwano na ye eṋe wina mu tungwa mumwe novakweṋu avehe okurira omatungiro Ndjambi ma tura mOmbepo ye (Ovaefese 2:19-22). Ete tji matu kara noruveze nokutura mouhona wa Ndjambi, ete matu rire ovapyuke momwinyo wombepo ondjapuke ya Muhona momwano wokutja atu ha  kurakurisiwa moundu wetu womoukoto. Omeriyamekero nomeriyarisiro aehe ye ya nokuyenda, posiya oundu wetu otjovature wouhona wa Ndjambi u karera nga aruhe.

 

²Nombaze ye yokunene we i twire mokuvare, nu indji yokumuho we i zikire kombanda yehi (Omavanduriro 10:2). Ete tu ri  momauhona yevari nu tu na otuveze mu yo  ayeevari, posiya katu sere okuyerunga mumwe. Nu tjinenenene katu sere okuzemba outakame wetu.  Nu ngunda noho atu ri ovakwatera wouye mbwi, oukwatera mbwi au yevari kau na okusokukara nondjinda ndji ta pamwe. Okurira omukwatera wouhona wa Ndjamibi kape na okutja u sokurikarera poo okukara erike poo okutara kondatumisire nongaro ohazerwa mokati kotjiwana. Nungwari mape hee kutja ouhona wouye mbwi kamaa u ku pe  omaheya, ondando noundu. ¹⁹Andakuzu oweṋe ovouye, ouye itjau mu suvera otja ovanatje vawo. Neṋe tjinga amu he ri ovouye mbwi, nungwari ami tjinga mbe mu toorora mu wo, ouye opu wa zokumutonda (Johanesa 15:19). Suta otjitjamurongo tjoye. Kara norupa momatoororero. Kara noviungura. Paha ouwa wotjihuro tjoye. O yandja kombara mbya sokurira ovya Muhona.​​​