¹¹“Etwako, ndi me ku rakiza ndinondi, kazeu kove nu kari ri kokure. ¹²Oro kari ri meyuru kutja motja: ‘Owaṋi ngu me tu rondere keyuru nokuketupahera ro, nokutuzuvisa ro kutja tu sore okuvitjita?’ ¹³Oro wina kari ri munda mbwina yomuronga kutja motja: ‘Owaṋi ngu me tu kondere munda mbwina yokuvare okuketuetera ro kutja tu ri zuve nu tu kare nonḓuviro ku ro?’ ¹⁴Ayee, kako, embo kove ri ri popezu tjinene, ove u na ro motjinyo tjoye na momutima woye; nambano kara nonḓuviro ku ro. ¹⁹Ami ndinondi me isana eyuru nehi kutja vi hongonone eṋe; omuinyo nonḓiro, nondaya nosengiro ami mbe mu raisira. Ritoororera omuinyo ove nozondekurona zoye kutja mu hupe. ²⁰Suvera Muhona, Ndjambi woye, puratena keraka re, nu panḓera pu ye, ove nozondekurona zoye kutja mu kare nomuinyo orure mehi Muhona nda kwizikira ooiho mukururume Abraham na Isak na Jakob noruyano okuriyandja ku wo” (Deuteronomium 30:11-14& 19-20).

 

Motjari ete ka tu na ouvara.  Posiya tu na ondoororero okutjita. ²¹Elia wa ya kotjiwaṋa na katja nai: “Mamu ripura pevari nai nga ruṋe? Muhona tje ri Ndjambi rikotameneye ku ye; nungwari Baal tje ri Ndjambi rikotameneye ku ye!” Nungwari otjiwaṋa katji mu zirire nandarire embo rimwe (1 Ozombara 18:21). ¹⁵Eṋe tji mu hi nombango okukarera Muhona rimaneye ndinondi kutja mamu vanga okukarera uṋe, kutja oomukuru vovisenginina ooiho mukururume kaave rikotamene mOmesopatamie, poo kutja owo mba vOvaamori vehi eṋe nambano mu mwa tura. Nungwari ami nonganda yandje matu karere Muhona ” (Joshua 24:15).

 

³Nu motjimbe tjotjari Ndjambi tje ndji pa ami me tja nai ku eṋe amuhe: Amu rivara oveni komeho ya imba pu mwa sokurivara, nungwari kareye nouripura ousemba otja kotjisanekero tjongamburiro Ndjambi ndje mu pa. ⁴Eṱe tu nouṋepo ouingi morutu rumwe, nu okaṋepo akehe kena otjiungura tjapeke. ⁵Nu komuhingo tjingewo nangarire kutja oweṱe ovengi, oweṱe ovorutu rumwe mu Kristus, nu twa wanekwa kumwe otja ouṋepo pekepeke worutu rumwe. ⁶Eṱe tu noviyandjewa vyotjari pekepeke otja kotjari Ndjambi tja yandja ku auhe wetu. Ingwi ngwa pewa otjiyandjewa tjokuzuvarisa Ombuze ya Ndjambi nga zuvarise otja kongamburiro ndje hongonona. ⁷Nu ingwi ngwa pewa otjiyandjewa tjokukarera mombongo nga karere; ngwa pewa otjiyandjewa tjokuhonga nga honge; ⁸ngwa pewa otjiyandjewa tjokupanḓiparisa ovakwao nge ve panḓiparise. Ingwi ngu yandja kovakwao nga yandje nouharupu; ngu ri omutarere wombongo nga ungure noupandi; ngu yandja ovyotjari kovakwao nge vi yandje nenyando ( Ovaroma 12:3-8).

 

Oviyandjewa vyombepo ovyo Muhona ombye yandja na  vyo omasa kovakambure ovatakame kokuungura oviungura Eye mbye vye isanena.  ²Otjari nohange ngavi takavarisiwe mu eṋe mondjiviro yeṋu ya Ndjambi noya Jesus, Muhona wetu. ³Momasa we otja ngu ri Ndjambi, eye we tu pa avihe mbi twa hepa mongarero, ndji tjata ku ye. Nomayandjero nga ye za mokutja eṱe tu tjiwa Ndjambi, ingwi ngwe tu isana kutja tu kare noruwano mounene na momasa we. ⁴Mokutjita nao eye we tu pa oviyandjewa ovihuze novinene tjinene mbya kwizika. Komuhingo mbwi eṋe otji mamu sora okutaurira omazunḓarero nge ungura mouye momuano wozonḓuma, nokuwanekwa mongaro ya Ndjambi (2 Petrus 1:2-4).

 

Muhona nge kupe otjari tjokuzuva kutja omutima wa Muhona u rikendera ete atuhe. Ete kawete ovasemba; twa sana peke mena rokutja ondjerera I ramba ondorera. Risusuparisa mena rokutja omerisisparisiro ongaro yomeritjindiro wOvapristeri wOmbara ondekasane yomasa. Ete kamaa tu tiza ouvara nomasa nokuhina omerisusparisiro. Eye me tupe omasa nongurameno osemba kokutja tu yenene okuungura nokukaenda mongaro yOumukuru, kutja atu ha hihamisa ovandu nu tu kuture ovapandekwa, okupita momapando nokuya konguturiro.

 

Oviyandjewa vyombepo ondjapuke orupa rwa imbi avihe mbi tu hepa kokuyenenisa ozondando ze mominyo vyetu. Omundu auhe ma yenene okutona mokuungurisa oviyandjewa kokuvandurura Jesus Kristus nouhona we kombanda yehi. Mu nao ovandu avehe tji mave ungura kumwe, ovina ovinene mavi yenene okuyenenisiwa mouhona wa Ndjambi. ⁴Pe noviyandjewa pekepeke vyOmbepo, nungwari ovyo vi yandjewa i Ombepo ya Ndjambi. ⁵Pe nomihingo pekepeke vyokukarera, nungwari Muhona iumwe ovandu ngu ve karera. ⁶Pe novyungura pekepeke vyomasa vyokukarera, nungwari Ndjambi ongu yandja omasa ku auhe otja kotjiungura tjokukarera. ⁷Nu ku auhe peke kwa yandjewa omaungurisiro wOmbepo kombwiro yaavehe. ⁸Komundu umwe Ombepo ya Ndjambi ya yandja ko otjiyandjewa tjokuhungira ombuze younongo; nu komukwao Ombepo tjingeyo ya yandja ko otjiyandjewa tjokuhungira ombuze yondjiviro. ⁹Nu ku umwe Ombepo tjingeyo ya yandja ko ongamburiro, nu komukwao Ombepo tjingeyo ndji ya yandja ko omasa wokuverukisa. ¹⁰Komundu umwe Ombepo i yandja ko omasa wokutjita ovihimise, nu komukwao a rire otjiyandjewa tjokuzuvarisa ombuze ya Ndjambi, nu wina komukwao a rire omasorero wokusosonona ozombepo, kutja oya Ndjambi poo ozoposyo. Nu wina ku umwe i yandja ko omasorero okuhungira omaraka pekepeke, nu komukwao i yandja ko omasorero wokuyehandjaura. ¹¹Nungwari oviṋa avihe mbi vi ungurwa i Ombepo ya Ndjambi, oyo i yandja ku auhe peke punga amai vanga  (1 Ovakorinte 12:4-11).

 

 

Ounongo:

²⁰“Nu ounongo, hapo mau vazewa pi? Nondjiviro mai munika pi? ²¹Kape notjiutwa otjinamuinyo tji matji u munu, nandarire ozonḓera nḓu maze tuka meyuru. ²²Nangarire otjovakoke nonḓiro mavi itavere kutja ovyo vya zuva onḓuvarero younongo porwayo. ²³“Ndjambi erike ongu tjiwa ondjira, nongu tjiwa poṋa pu pe vazewa ounongo, ²⁴eye tjinga e muna nga komayandero wouye, noviṋa avihe mbi ri kehi yevaverwa, eye u vi muna. ²⁵Ndjambi tja yandja kombepo omasa wayo, na zikamisa omiruko vyokuvare, ²⁶na tye poṋa pu mape sokuroka ombura, nondjira ovikamba vyotuṱuṱumo mu mavi sokuryanga, ²⁷eye otja muna ounongo ne u zuvarisa; neye we u zikamisa ne u konḓonona wina. ²⁸“Ndjambi wa tja nai komundu: ‘Ondira ku Muhona oyo ounongo; nokutonda ouvi oko ondjiviro’ (Job 28:20-28).

 

Ounongo otjiyandjewa okuza ku Ndjambi, mbu tjita kutja tu kare nondoororero nokuyandja ounane mbu ri otja kondero ya Ndjambi. Owo u tu vatera okuzuva ovina otja koumune We, okumuna owatjiri nokuungirsa  wo okumuhivirika. ⁵Nu mokati keṋu tji pena ngu ma hepa ounongo, nga kumbe ku Ndjambi, neye me mu pe, Ndjambi tjinga e yandja nouharupu notjari ku avehe (Jakobus 1:5) ⁷Okurinikorera ounongo otjo otjiṋa otjinanḓengu kove. Ripahera ozondunge poviṋa avihe mbi u na vyo (Omiano 4:7). ¹⁷Nungwari ounongo mbu za kOmbanda owo rutengatenga oukohoke, nu wina owo ounahange noukozu nu u nondjiririsa; owo we ura nounyaṋutima, nu u twako ovihape oviwa. Owo kau tjiti ombangu nu kau notjavivi (Jakobus 3:17).

 

Ondira ku Muhona ondji ri omburo younongo ai yerike. Ounongo kau munika oupupu mouye, posiya ovina avihe mevaverwa vi yarisa ounene wa Ndjambi omeripura wetu pu ye hi na maaye yenene okuzuva. Ounongo ombutiro yomeritjindiro omawa nge ri ombutiro yokutira Muhona, I tupa ondjiviro yokupoka kouvi. Mokukara nondira ku Muhona ku tjita kutja u kare nounongo,  u zuve nawa nu u kare nondjiviro. ⁷Ondira ku Muhona oyo ombutiro yondjiviro. Ovandu omayova ve nyengura ounongo nomavyuriro (Omiano 1:7) ¹⁰Ondira ku Muhona oyo ombutiro younongo; avehe mbe nonḓuviro komarakiza we, ve nozondunge ozombwa. Ondangero ya Muhona i karerera nga aruhe (Omapsalme 111:10). ¹⁰Ondira ku Muhona oyo ombutiro younongo, nokutjiwa ingwi Omuyapuke Umwe oko ondjiviro (Omiano 9:10).

 

Ounongo woundu kau na omaziriro aehe. Ondjiviro nomahongero vina opu vi yandera. Okuzuva omwinyo, ete tu hepa ounongo mbu munika membo ra Muhona ariyerike. Ete tji twa tjiwa kutja Muhona ma tara ku avihe mbi matu tjiti, ete matu sokuhupa noungongo, okuzemburuka kutja Muhona  u ri pu na ete oruveze aruhe nokukara nonduviro komirari vye. Ete matu yenene okukara nounongo wa Ndjambi indu tji tuna onduviro ku Ye.

 

Ounongo kau ri pu ami!’ ¹⁵Owo kau randwa nongoldo nu kau sutwa nosilveri (Job 28:15). ¹⁶Tjiri, okokuwa tjinene okurinyanyangizira ounongo pongoldo, nokuritoororera ozondunge posilveri (Omiano 16:16). ¹²Orondu ovimariva punga avi yandja ondjamo, ounongo opunga au yama wina; nungwari otjiṋa otjinanḓengu kondjiviro otjo hi: Ounongo u ṱakamisira omuini wawo omuinyo (Omuzuvarise 7:12) .  ¹³Mu nomundu omunaunongo nomunazondunge mokati keṋu are? Eye nge vi raise notjikaro tje otjiwa novitjitwa vye vyomerisusuparisiro novyounongo (Jacobus 3: 13).

 

¹⁰Ekuva roye tji ri ri eṱi, nove tji u hi nokuriupika, mo ungura nomasa tjinene komeho; nungwari okutenga okuripura oko ounongo (Omuzuvarise 10: 10).

 

Pe hepa ounongo wapeke okuhupa mouye wokuhena ongamburiro. Tjimuna oruveze mu mu  na onyengo kovakambure, ete matu sokuyarisa ounongo mokuyandja ondengero ku imbi mbi ri owatjiri novisemba nokupirukira imbi ovivi. Omukambo omunahepero kokutja u kure, okurihonga okuhana ouwa ku na ouvi. Momwano mbo Muhona me tu vatere okuza membo Re, okuza ombepo ye norutu rwaKristus nokereka. Ounongo nondjiviro ovinene pozondunge nokuhongwa, mena rokutja omundu wozondunge nu ngwa hongwa ma enene okuwovisa oupupu. ¹⁹Orondu ounongo wouye mbwi owo ouyova komurungu wa Ndjambi. Nomatjangwa maye tja: “Ndjambi ma pata ozonongo mombate yozondunge zazo” (1Corinthians 3:19). ⁵Ṱakama mu Muhona nomutima woye auhe. O riyameke ku imbi mbi mo tjangovasi mo tjiwa (Omiano 3:5). ¹⁵Amu suvere ko ouye noviṋa avihe vyouye. Tji mwa suvere ouye, okutja kamuya suvera Tate. ¹⁶Oviṋa avihe vyouye, okutja imbi omundu omunauvi mbye zera, na imbi ovandu mbi ve muna nu mbi ve vanga, na imbi avihe mouye mbwi ovandu mbi ve rihivira, kape na nangarire tjimwe tji tji za ku Tate; avihe vi za mouye. ¹⁷Ouye na imbi avihe mbi ri mu wo, ovandu mbi ve zera, vi yanda; nungwari ingwi ngu ma tjiti ombango ya Ndjambi, eye ma karerere nga aruhe (1 Johanes 2:15-17).

 

 

Ondjiviro:

¹⁵Omunazondunge aruhe u muna ondjiviro, nokutwi kwonongo ku paha ondjiviro (Omiano 18:15).

 

²Ami mbi tjita nai kokutja owo ve panḓiparisiwe nu ve kutwe kumwe morusuvero, nu ve ramangere oukoto wondjiviro aihe, kokutja ve tjiwe otjiundikwa tja Ndjambi tji tji ri Kristus omuini. ³Mu ye omu mwa horekwa ovihuze avihe vyounongo nondjiviro ya Ndjambi (Ovakolose 2:2-3).

 

Ounongo wa Mukuru ootjina otjinandengundengu omundu tji ma sokukara na tjo, nu opakahu kokutja okutjiwa Mukuru apeerike kape ya yenena; ounongo  wa Mukuru mau sokutjita kutja tu yakure oukarepo wetu naye nondangu.

 

Ondjiviro otjiyandjewa okuza ku Ndjambi, ndji tjita kutja tu  zuve ovina vyopopambepo nawa. . ⁶Muhona ongu yandja ounongo; ku ye ku za ondjiviro nozondunge (Omiano 2: 6).  Mukuru u yandja ondjiviro nu ku imba mbe mu tenga mave yakura yo. Eye u yandja otjiyandjewa tjounongo okuza motjipwikiro tjounongo we mbu ha yanda, nu kakutja ounongo we kau yanda uriri, nungwari owo oukahu.  ³³Outumbe wotjari tja Ndjambi ounene tjinene, nu tjiri, ouhasanekwa! Ounongo nondjiviro ya Ndjambi, tjiri ovihavazewa! Owaṋi ngu ma sora okuteza ozombanguriro ze? (Ovaroma 11:33).

 

¹Matu tjiwa kutja eṱe atuhe tu nondjiviro. Ondjiviro i tjita kutja omundu e rihive, nungwari indwi orusuvero ru tunga ombongo. ²Tji pena ngu ma tjangovasi eye u notjiṋa tji ma tjiwa, tjiri, eye ke nondjiviro omundu ndje sokukara na yo. ³Nungwari omundu ngwa suvera Ndjambi eye u tjiukwa i Ndjambi (1 Ovakorinte 8: 1-3).

 

Okuurisiwa mondjiviro ya Mukuru orupa romuKriste rokukura nu otjina ovaKriste avehe tjive sokutuurungira mo otja tji matu kuru. ¹⁸Nungwari panḓereye pokukura motjari na mondjiviro ya Muhona nOmuyame wetu Jesus Kristus. Neye nga yozikwe nambano nga ko nga aruhe! Amen (2 Petrus 3:18).

 

²⁰Timoteus, ṱakamisa nawa ihi tji tja yandjewa kove. Riisa mo momahungiriro womungandjo na momapatasaneno wouyova, ovandu tjiva ngu ve hungira posyo ave tja: “Ondjiviro”. ²¹Pe novandu tjiva mbe tja owo ve nondjiviro ndji. Nu komuhingo mbwi otji va poka kongamburiro. Otjari tja Ndjambi ngatji kare na ove! (1 Timoteus 6: 20-21).

 

 

Ongamburiro:

¹Ongamburiro oyo okuriyameka koviṋa, mbi tu undja, nokutjiwa, tjiri, imbi mbi ha munika. ²Ongamburiro otja indji ondja tjita kutja ovandu woruveze orukuru ve tjate ku Ndjambi. ³Omongamburiro eṱe tji tu tjiwa nawa kutja ouye wa utwa i embo ra Ndjambi, kokutja imbi mbi munika vya zire mu imbi mbi ha munika. ⁶Kape nomundu ngu tjata ku Ndjambi e hi nongamburiro. Orondu ingwi ngu meya ku Ndjambi ma sokukara nongamburiro yokutja ku na Ndjambi, nokutja eye u yandja ondjambi ku imba mbe mu paha (Ovaheberi 11:1-3 & 6).

 

Ongamburiro otjiyandjewa okuza ku Ndjambi tji tji tjita kutja tu kare nongamburiro mu Muhona nokuhohiza varwe okukara nongamburiro mu Muhona wina indu kutja mave pitire mu tjike.  Ongamburiro oombutiro ya avihe mbi tu tjita. ⁸Orondu eṋe, tjiri, mwa yamwa i ongamburiro mena rotjari tja Ndjambi. Nondjamo ndji kai zire mu eṋe oveni, nungwari oyo otjiyandjewa tja Ndjambi. ⁹Oyo kai zu moviungura vyeṋu oveni, notji pe hi nokusokukara omundu ngu me rihivi omuini (Ovaefese 2:8-9). ¹⁴Vakwetu, mape vatere tjike omundu tji ma tja eye u nongamburiro, novitjitwa vye tji vi hi nokuraisa ongamburiro ndji? Ongamburiro ndji mai sora okumuyama are? (Jakobus 2:14).

 

Ongamburiro I na ondando nonduri imwe – ndi ri embo ra Ndjambi. ¹⁷Ongamburiro otji i za momazuvarisiro omundu ngu ma zuu, nomazuvarisiro ngu tu zuva owo omazuvarisiro wa Kristus (Ovaroma 10:17).

 

⁷Eṱe omahupiro wetu ye za mu imbi mu tu kambura nungwari ka ezu mu imbi mbi tu muna (2 Ovakorinte 5:7). ⁸Eṋe mwe mu suvera, nandarire kutja kamuye mu muna; nu mwa kambura mu ye, nangarire kutja nai kamu nakumumuna nambano. Notji mamu yoroka nondjorokero onene nonamasa omundu ndje hi na maa yenene okutamuna, ⁹eṋe tjinga amamu pewa ondjamo yominyo vyeṋu ndji ri omayenenisiro wongamburiro yeṋu mu ye (1 Petrus 1:8-9). ⁴⁰Jesus wa tjere ku ye: “Ami hi ku raerere kutja tji wa kambura, mo munu omasa wa Ndjambi tji maye riraisa are?” (Johanes 11:40). Ete matu sokukambura ngunda atu hi na okumuna mena rokutja tji mo munu ko hepa okukambura – opo opakahu uriri nu ko na okuhepa ongamburiro. 

 

Ongamburiro I havehwa mondengu nungwari kamowingi. ²⁰Jesus wa zira a tja: “Orondu tjinga amu hi nongamburiro ndja yenena. Tjiri, me mu raere kutja andakuzu mu nongamburiro ndji ṱeki pondwi yomumosteri, atja mu yenena okutja nai kondundu ndji: ‘Humburuka u kakurame mbena!’ noyo atjai humburuka. Nu katjamu urwa i otjiṋa!” (Mateus 17:20). ³²Oyo ondji ri onḓiṱinḓiṱi pozondwi azehe, nungwari oyo tji ya hapa ondji ri onenenene povihape avihe. Oyo i rira omuti omunene, nozonḓera zeyuru maze ya aze tungu oviruwo mozondavi zawo (Mateus 13:32).

 

Ongamburiro yetu mai rorwa.  Tjimuna ongolto ndji hi ya kurwa  tji I hi na ondengu – ongamburiro ndji hi ya rorwa kai na ondengu ku Mukuru. ²Vakwetu, rivareye ovaṋingandu omarorero aehe tji maye mu wire momihingo pekepeke, ³orondu eṋe mamu tjiwa kutja ongamburiro yeṋu tji ya toṋa momarorero nga, mai mu pe onḓaro orure. ⁴Nonḓaro orure ndji ngai mu tjinde aruhe nokuhinokuisa, kokutja mu rire ovasore novehinatjipo nu mu yenene moviṋa avihe (Jacobus 1:2-4). ¹Vakriste ovakwetu, oweṋe ova Ndjambi, nu mwa isanenwa okurumata ovyeyuru. Opu mamu sokuzemburuka Jesus ngwa hindwa i Ndjambi okuyekurira Omupristeri Otjiuru wongamburiro eṱe ndji tu hongonona (Ovaheberi 3:1). ¹⁴Nu ngunda nambano atu nOmupristeri Otjiuru omunene ngwa kakurama komurungu wa Ndjambi, okutja oJesus, Omuna wa Ndjambi, ngatu kakatere kongamburiro, ndji tu hongonona (Ovaheberi 4:14). ²³Ngatu kakatere nokuhina kukeyakeya komaundjiro ngu tu hongonona, orondu Ndjambi eye omuṱakame, eye u yenenisa imbi mbya kwizika (Ovaheberi  10:23).

​

​

Omberukiro:

⁵Nungwari omena romauvi wetu eye tja usurwa ovirwaro; eye wa tonenwa ourunde eṱe mbu twa tjita. Eṱe twa eterwa ohange i omberero eye ndja muna, nu twa verukisiwa i omazeze womatoneno we (Jesaya 53:5).

 

¹⁷Ami me ku verukisa rukwao; me verukisa ovirwaro vyoye, nangarire kutja ovanavita na ove mave tja nai: ‘Sion tja imbirahiwa; kape na ngu na ko na tja na tjo.’ Ami, ngu mbi ri Muhona, owami ngu mba hungire” (Jeremiah 30:17).

 

²⁴Kristus omuini wa tjinda ourunde wetu morutu rwe kotjikoroise, kokutja tu ṱire ourunde nu tu kare nomuinyo kousemba. “Neṋe mwa verukisiwa i omazeze we” (1 Petrus 2:24).

 

Omberukiro otjiyandjewa tjapeke; Okuungurisa omasa wa Mukuru komberukiro, kokuverura omundu ngwa vere, ondjahe poo ngu hupa ouzeu. Omberukiro otjiyandjewa tji matji sokuyakurwa nongamburiro. Markus 5:25-34 matu rese omukazendu ngwa verere orwandara koure wozombura omurongo nambari. Eye watja: indu tjimba yenene okutuna kombanda Ye uriri, ami me verukisiwa. Eye wa tuna kombanda nekere nu posiya ongamburiro ondya tu na ku Ye nai yeta omberukiro. ³⁰Tjimanga Jesus we rimuna kutja mu ye mwa zu omasa ngapiti, notja tanaukira kotjimbumba na pura a tja: “Owaṋi ngwa ṱunu kombanda yandje?” (Markus 5: 30). ³⁴Nu Jesus opa tjera ku ye: “Muatje wandje, ongamburiro yoye ye ku vatere! Twende mohange, nu veruka komutjise woye” (Markus 5:34).

 

Omberukiro iza mokuzuva nokukara nonduviro keraka ra Muhona. ²⁶Eye wa tja: “Ove tji mo puratene keraka ra Muhona, Ndjambi woye, nouṱakame, no tjiti imbi mbi ri osemba momeho we, no puratene komatwako we, noṱakamisa omazikamisiro we, himee eta omitjise omizeu kove, mbi mba twa kombanda ya Engipte; orondu owami Muhona, ngu me ku verukisa” (Eksodus 15:26). Embo ndi Rapha mari tja omberukiro po okuyarura koupe.  Yehova Rapha ri heya kutja “Muhona ngu verura Yehova Rapha irimwe womana omengi wa Muhona nge handjaura oundu We -  kokuverura.

 

Ondanaukiro i yeta omberukiro  ¹Otjiwaṋa matji tja nai: “Indjeye tu yaruke ku Muhona!Eye we tu hihamisa, nungwari, tjiri, me tu verukisa rukwao. Eye we tu usura ovirwaro, nungwari, tjiri, ma kutu ovirwaro vyetu mbi (Hosea 6: 1). ¹⁴Mbe ri ovandje omuini, nowo tji mave risusuparisa nave kumbu ku ami, nave ritanaura nave isa omauvi ngu va tjita, ami meve zuvire meyuru, e ve isire ourunde wawo ne ṋingaparisa ehi rawo (2 Ekuruhungi 7:14).

 

Okuza membo, Jesus wa verura ovengi nu wina ndino Muhona ongu verura- ete ka maatu verura omundu. ¹⁷Oviṋa mbi we vi tjitira kutja omambo womuprofete Jesaja ye yenenisiwe, indu tja tjere: “Eye omuini wa zara omihihamo vyetu, nu wa tjinda omitjise vyetu” (Mateus 8:17). ⁶Nungwari, tara, ami me verukisa otjihuro hi novandu vatjo, nu meve pe omberukiro rukwao. Ami meve raisire ohange nombwiro onyingi (Jeremia 33:6).  Omasa wa Muhona womberukiro ye kapitira mu ete okuyenda morutu romuvere nai mba mba kurungisiwa. ¹⁴Tji pe nomundu ngwa vera, eye nga isane ovanene wombongo, nowo mave mu kumbire nave mu twirisa nomaze womiṋinga mena ra Muhona. ¹⁵Nongumbiro ndji tji ya kumbwa mongamburiro, oyo mai verukisa ingwi omuvere. Muhona me mu verukisa, nourunde, mbwa tjita, eye ma isirwa. ¹⁶Punao, auhe weṋu nge rihepure ourunde we komukwao, nu mu kumbirasane, kokutja mu veruke. Ongumbiro (Jakobus 5:14-16).

 

³Eye u verukisa imba mbenomitima mbya ṱukuṱuka,nu u kuta ovirwaro vyawo (Omapsalme 147:3). ²Tanga Muhona, muinyo wandje, nu o zembi oviungura vye avihe oviwa!  ³Eye ongu ma isire omauvi wandje aehe, nu ongu ma verukisa omitjise vyandje avihe (Omapsalme 103: 2-3). Omberukiro ya Muhona I tuna mourekoto. Muhona, ngu verura, utu yarura koupe popanyama, popambepo na moundu wetu moukoto.

 

 

Ovihimise:

²²“Neṋe varumendu Ovaisrael, puratene komambo nga: Ndjambi wa tjiukisa Jesus wa Nasaret ku eṋe movihimise ovinamasa na moviraisiro eye mbya tjitire mu ye mokati keṋu, eṋe oveni otja tjinga amamu tjiwa (Oviungura 2:22).

 

Otjiyandjewa tjovihimise oviundikwa vya Mukuru ovikoto mbya kapita ouripura woundu mbi zeuparisa mombepo, nokuyarisa omasa waNdjambi omanene, nokuyandja outakame wembo ra Muhona nokutjita kutja ovandu ve zemburuke kutja Mukuru u ungura mouye mbwi. Ovihimise ovina vyapeke mbi tjitwa movikando tjiva nu mbi yenena okutjitwa  I yomasa wa Mukuru omuini porwe. Ovihimise vi yenena okupitira ongarate mu Mukuru po okupitira momundu tja ungurisiwa. ²⁶Jesus we ve tara osemba na ziri a tja: “Otjiṋa hi ovandu matji ve uru, nungwari Ndjambi ke notjiṋa tji tje mu ura” (Mateus 19: 26).

 

Jesus wa ri omundu womasa noviungura vyapeke, nu kamomambo uriri. Jesus wa tjita ovihimise kokuzeuparisa ombuze ye kovandu nokuhonga ovahongewa ve oundu we mu Mukuru. Ete otja pu matu zeuparisiwa kutja Jesus ongu ri Mukuru, opu matu munu omasa norusuvero rwe. Oviungura vya Jesus mavi yarisa kutja ma enene okuyama ngamwa omundu, nokuhina okutara korukapitaveze rwe. Ovihimise vye vyondjesiro vi yeta omberukiro, omeurisiro nu vi rundura ominyo vya imba mbe nongamburiro mu Ye.  ¹⁴Oove Ndjambi ngu u tjita ovihimise; Ove wa raisa omasa woye koviwaṋa (Omapsalme 77: 14).

 

Ete tji matu zuvarisa ombuze ombwa ya Jesus Kristus, ombeipera mai tja ¹⁷Imba mbu mave kambura mave pewa omasa okutjita mbi: Mave pitisa ozombepo ozohakohoke mena randje; mave hungire momaraka omape (Markus 16:17).

 

​

Omaprofetero:

¹Ramangeye orusuvero. Nu zereye oviyandjewa vyOmbepo, nu tjinene ingwi okuzuvarisa ombuze ya Ndjambi (1 Ovakorinte 14:1).

 

Omaprofetero omasa wokombanda nge yandjwa i yombepo ondjapuke komukambure okuhungira embo rokumurungu woruveze nombuze ndji  mai zu ku Ndjambi, nge he na okuza kounongo, ozondunge poo momahongero womukambure. Omaprofetero o Mukuru ngu u ungura kawete.

 

²⁴Nungwari avehe tji mave zuvarisa ombuze ya Ndjambi, nu tji pa hiti omuhakambura poo omuyenda mongamburiro, u sokurimuna kutja eye, tjiri, omunandjo, tji ma puratene komazuvasirio nga; neye ma pangurwa i imbi mbi ma zuu. ²⁵Ouripura we ouhorekwa womomutima otji mau horoka, neye otji ma u kozongoro ne rikotamene ku Ndjambi ama hongonona nai: “Tjiri, Ndjambi u ri mba mokati keṋu!” (1 Ovakorinte 14: 24-25). Omukambure ma enene okurira omurari omuungirisiwa wa Muhona, okuhunigira embo rokomurungu woruveze ndi mari zu mu Mukuru nungwari ka momukambure omuini.  Ondando yomaprofetero okuviura nokuzeuparisa nokuhuhumina ovandu va Mukuru.

 

Embo romaprofetero nda piti mari yenenisiwa kombanguriro. ²⁹Nu imba mba pewa ombuze i Ndjambi, vevari poo vetatu ngave hungire, nu imba ovakwao ve sosonone omambo wawo (1 Ovakorinte 14:29).  ¹⁹Amu pirukire Ombepo Ondjapuke; ²⁰amu tengurura omaronga eye ngu memu pe. ²¹Roreye oviṋa avihe nu mu ṱakamise ihi tji tji ri otjiwa, ²²nu kareye ohumburuko nouvi ngamwa auhe (1 Ovatesalonika 5:19-22).

 

Omerizirira womuporofete ya ri okurakiza nokutuna ovandu pu mave vanga okupoka kozoveta za Muhona. Ombeipera, omahongero nge honga owatjiri, nomahongero wozondunge okuza kovakambure omarakiza kwete.  Auhe ngu metu raisire  kutja matu poka vi kembo  ra Muhona ma rire ondaya. ⁵Okunakaura imbi iho mbye ku honga okwo ouyova; nokuyakura omavyuriro we okwo ounongo (Omiano 15:5).  Okurundurura ominyo vyetu mokukara nonduviro ku Muhona ku hepa kutja ngatu toore omirari mbi mavi tu ihamisa poo okuungura oukukutu. Ete matu sokupaha ovandu mbe na owatjiri na ete ohunga nomaungundipare wetu mominyo vyetu. ³¹Eṋe amuhe mamu sora okuzuvarisa ombuze ya Ndjambi, nungwari nga rire koumweumwe, kokutja avehe mba wongara mbo ve rihonge nu ve panḓiparisiwe (1 Ovakorinte 14:31).

 

 

Okusosonona:

¹⁰kokutja mu sore okutoorora imbi mbi ri oviwaviwa. Neṋe otji mamu rire ovakohoke novehinatjipo meyuva Kristus ndi meya (Ovafilipi 1: 10).

 

¹²Embo ra Ndjambi ri nomuinyo nu ri nomasa. Oro etwe okukapita engaruvyo ngamwa arihe, ndi konda kuvari, nu ri tuvakaṋa nga omuinyo nombepo pu vi hakaenena, nu nga omaṱupa nomongo pu vi hakaenena. Oro ri sosonona omeripura nomerizemburukiro womutima. ¹³Nu kape notjiutwa tji tji undikwa komurungu wa Ndjambi; avihe vi munika nu vi ri poruhaera komurungu we. Neṱe tu sokuyandja omerizirira wovitjitwa vyetu ku Ndjambi (Ovaheberi 4:12-13).

 

Embo ra Muhona orini kourike risosonona omeripura nozondando zomitima vyetu. Okusosonona ku tupa kutja tu twepo ombangu, nokuhana mokutjita ongondononeno ongoto, nokutara nawa kutja otjina tjazu ku Muhona nu tjiri moutakame.

 

Yakura ondengu yembo ra Muhona okuza mokusosonona.  Omambo aehe ngu maye piti motjinyo tjandje omasemba; kamuna ovineya mu wo nu kamaaye kara nokuhena owatjiri mu wo. ⁸Omambo aehe ngu me hungire owo omasemba; kape na nge ri posyo poo nge wovisa. ⁹Ku ingwi ngu nozondunge owo omakahu; ku ingwi ngu nondjiviro owo omasemba  (Omiano 8: 8-9).

 

Okupaha okusosonona ondando ya imba mbe nondero okuvanga okukaenda osemba. ⁹Avehe mbe ri ozonongo ngave zuve imbi mbya tjangwa mba, nowo ngave vi ṱakamise momitima vyawo. Orondu ozondjira za Muhona ozo ozosemba, novasemba ve hupa mokuzetwara, nungwari ovarunde ve putara ave u, tjinga ave nakaura ozondjira nḓa (Hosea 14:9). ¹²⁵Owami omukarere woye; ndji pa ozondunge kutja mbi tjiwe omahongero woye (Omapsalme 119: 125).

​

²¹Kakatera kounongo na kozondunge, muatje wandje. O vi esa kutja vi ze po pove. ²²Ovyo mavi ku pe omuinyo, nu mavi rire otja oviharekwa mosengo yoye. ²³Mo yenene okutwara ondjira yoye nokuhinatjipo, nu komoo putara. ²⁴Komoo tira ooma tji mo karara, nu mo rara noupore ouṱuku auhe (Omiano 3:21-24).

 

 

Okuhungira Momaraka:

¹Neyuva ra Pentekoste tji reya, owo avehe tjandje va woronganene poṋa pemwe. ²Kamanga otji pa tjitwa ombosiro ndja zire meyuru tjimuna oyotjivepo tji matji hingi nomasa, noyo arire tji ye urisa ondjuwo aihe mu va karere pehi. ³Nowo va muna omaraka womuriro nga haṋikire, nowo aye kakara kombanda yaauhe wawo. ⁴Nowo avehe ve urisiwa nOmbepo Ondjapuke, narire tji va utu okuhungira omaraka wovandu varwe, Ombepo Ondjapuke punga aye ve pere okuhungira (Oviungura 2:1-4).

 

²Ingwi ngu hungira omaraka pekepeke eye ka hungirire ovandu, nungwari u hungirira Ndjambi, tjinga ape hi na ngu me mu zuu nawa. Eye u hungira omaundikiro nomasa wOmbepo.  ⁴Ingwi ngu hungira omaraka pekepeke eye u ritunga omuini, nungwari ingwi ngu zuvarisa ombuze ya Ndjambi eye u tunga ombongo aihe. ⁵Ami etje vanga kutja eṋe amuhe mu hungire omaraka pekepeke, nungwari tjinene etje vanga kutja mu zuvarise ombuze ya Ndjambi. Orondu ingwi ngu zuvarisa ombuze ya Ndjambi eye omunanḓengu tjinene komeho okukapita ingwi ngu hungira omaraka pekepeke, pendje na indu tji pe nomundu ngu ma sora okutoroka omambo we, kokutja momuhingo mbwi ombongo aihe i sore okutungwa (1 Ovakorinte 14:2; 4-5).

 

Embo rovaGreeke nda handjaura eraka kutja otjikwaye, ri heya kutja omarakaraka pekepeke. Otjiyandjewa tjomarakaraka tji tjita kutja tu hungire meraka omuhungire nde hi yarora okurihonga kaparukaze mokusuvarisa komundu ngu hungira eraka ndo. ⁶Nu, vakwetu, ami tjinangara meya ku eṋe, me mu vatere na tjike tji me hungire omaraka pekepeke. Tji me mu vatere, karondu porwe tji me mu vandururire omauatjiri wa Ndjambi poo tji me mu etere ondjiviro poo ombuze ya Ndjambi poo omahongero? (Ovakorinte 14:6). Okuhungira momararaka ounandengu ku ingwi ngu ma zuu eraka ra Ndjambi meraka re omuini, nu mai rire omungandjo ku varwe indu ndoovazu eraka kari na okutanaurwa.

​

​

Omatanauriro womaraka:

¹³Ingwi ngu ma hungire omaraka pekepeke, u sokukumbira otjiyandjewa tjokutoroka omaraka nga (Ovakorinte 14:13).

 

Otjiyandjewa tjokutoroka omaraka omasa wokuzuva nokutanaura omaraka pekepeke meraka roye omuini. Otjo otjiyandjewa tjapeke posiya tji ungurisiwa pu na otjiyandjewa tjomarakaraka.

 

Ouhepe weraka wokomurungu woruveze ombu hana otjiyandjewa tjopopambepo notjiyandjewa otjikwatera mbi tjita kutja omundu ma enene okuzuva nokuhungira omaraka pekepeke.

 

Ondando ya ri oyo kutja avehe ve zuve nu ve mune mo ouwa okuza mowatjiri mbu mau hungirwa nokutunga okereka. Opo kapa ri ouwa kounepo warwe wokereka okupuratena kovina mbi ve hina okuzuva.  Okuungurisa otjiyandjewa tjomaraka nokuhina otjiyandjewa tjokutoroka okuritjatisa nu ka ku tungu.  ²⁸Nu tji pe hi nomutoroke, ingwi ngu hungira omaraka pekepeke nga mwine mombongo, nu koye a rire ke kerihungirira omuini ku Ndjambi (Ovakorinte 14:28).

 

Ovihape vyombepo ondjapuke  ovyo otjiyarisiro tjombepo ondjapuke ndji ri  momuKriste. Imwe yozondando zombepo Ondjapuke okuya momuKriste nokuyeta ondanaukiro momwinyo we. Oviungura vyombepo ondjapuke okukutanaura kutja u sane ku Kristus nokukara tjimuna Ye. omuKriste  kaaruhe tji ma kara nondoneno okuura mokuyarisa ovihape vyOmbepo Ondjapuke. Imwe yozondando zomuinyo womuKriste, okuyandjera ombepo ondjapuke kutja I tone moku eta ovihape ovingi tjinene mominyo vyetu nokuyandjera ombepo ondjapuke I pirukire omananukiro wouvi. Ovihape vyOmbepo Ondjapuke Muhona ombye  vanga kutja vi kare momwinyo vyetu, nu  nombatero yOmbepo Ondjapuke mape yenene.

 

¹⁶Eṋe mamu ve zemburukire kovihape vyawo. Omiti vyomakuiya vi twako omandjembere are, nominanyiva vi twako omakuyu are? ¹⁷Omuti omuwa u twako ovihape oviwa, nomuti omuvi u twako ovihape ovivi. ¹⁸Omuti omuwa kau twako ovihape ovivi, nomuti omuvi kau twako ovihape oviwa. ¹⁹Nomuti auhe ngamwa mbu ha twako ovihape oviwa u kewa, au yumbwa momuriro. ²⁰Neṋe ovaprofete woposyo otjinga amamu ve zemburukire kovihape vyawo (Mateus 7:16-20).

 

²²Nungwari ovihape vyOmbepo ovyo mbi: Orusuvero, enyando, ohange, omuretima, oupore, omutima omuwa, ouṱakame, ²³omerisusuparisiro nomeritjaerero. Omatwako kaye kuramene oviṋa otja imbi momurungu. ²⁴Imba mbe ri ova Kristus Jesus va papera ongaro yawo youndu puna ozonḓuma nozonḓero zayo azehe kotjikoroise. ²⁵Ndjambi we tu pa omuinyo omupe mOmbepo ye: NOmbepo ndji i sokuturyangisa mongaro ndji. ²⁶Atu he rihivi, atu ha pindikisasana nu atu ha ṱasana eruru (Ovagalate 5: 22-26).​​​​