¹Ngu ma paha omaundiro mu Muhona, nu ngu ma kara mondjamo yOmunamasaaehe, ²ma yenene okutja nai ku ye: “Oove omuyame wandje omunamasa. Oove Ndjambi wandje ku mbe riyameka.” ³Eye, tjiri, me ku yama koviwonga avihe oviundikwa, na komitjise avihe omizeu. ⁴Eye me ku vandeke novivava vye; nu kehi yavyo omu mo munu mo ondjamo; ouṱakame we mau ku yama nu mau ku yeura. ⁵Ko nokuhepa okutira oviwonga uṱuku, nomarwisiro watjimanga mutenya, ⁶nomutjise omuzeu mbu ya monḓorera, nomaumba nge nyona mutenya. ⁷Nandarire kutja eyovi rimwe mari ṱire meṋe yoye poo omayovi omurongo okukukondoroka, kove kamaaku ṱunu otjipo. ⁸Nomeho woye omuini mo munu Ndjambi, tji ma vere imba avehe mbe mu nyengura. ⁹Orondu Muhona eye omaundiro woye, nu ingwi wOkombandambanda eye omuyame woye. ¹⁰Otjiwonga otji tji hi nokuya kombanda yoye, nozondjito zoutwe otji ze hi nokuvaza koyoye. ¹¹Ndjambi me ku rakizire ovaengeri kutja ve ku tjevere akuhe ku mo i. ¹²Owo mave ku tjindi momake wawo kutja o ha putara mewe. ¹³Mo kara nomasa kombanda yozongeyama ovindandi nozonyoka zouzuwo. ¹⁴Ndjambi ma tja nai: “Ami me yama imba mbe ndji suvera, nu me vatere imba mbe ndji i kutja owami Muhona. ¹⁵Owo tji mave ku ku ami, ami meve zuvire; tji ve ri mombamisiro, ami me kara puna wo, meve kutura nu e ve yozike. ¹⁶Meve pe okuhupa orure, nowo mave munu ombatero, ndji va undja” (Omapsalme 91).

 

⁹Rizemburuka nomarakiza wandje ngu maye tja: ‘Yanḓipara nu rira ependa!’ O tira, nu o mumapara, orondu ami, ngu mbi ri Muhona, Ndjambi woye, mbi ri puna ove ngamwa akuhe ku mo i” (Josua 1:9). ¹³Omarorero ngamwa aehe ngu mwa muna owo nga hapo nge ya kovandu. Ndjambi eye omuṱakame neye ke nakumutarera amamu rorwa okukapita omasa weṋu. Nomarorero tji ye ya, eye me mu pe omasa, kokutja mu yenene okupirukira omarorero nga (1 Ovakorinte 10:13).

 

¹¹Ripangaṋeye novirwise Ndjambi mbi me mu pe kokutja mu sore okupirukira omatjendje wa Satan. ¹²Orondu eṱe katu nokurwa novandu, nungwari matu ru nozombepo ozonamasa zouye ourunde mbwi, nomauhona nomauvara nozombara zouye mbwi wonḓorera. ¹³Opu mamu sokuripangaṋa novirwise vya Ndjambi nambano! Kutja, eyuva roumba tji re ya, eṋe otji mamu yenene okupirukira omarwisiro womunavita. Nu tji mwa zu nokurwa nga komaandero, ingee mamu zikama. ¹⁴Opu mwa sokurirongera amwa kutwa nekwamo rouatjiri pomahuri namwa zara ousemba otja mbu ri ombanda yotjitenda yomorukoro, ¹⁵namwa zara omerirongerero wokuzuvarisa Ombuze Ombwa yohange otja nge ri ozongaku kozombaze zeṋu. ¹⁶Nu aruhe tjindeye ongamburiro otja oruvao meke reṋu; orondu nongamburiro ndji mamu sora okuzemisa oviku vyomuriro vyaingwi umwe Omunauvi. ¹⁷Nu zareye ondjamo otja ekori rotjitenda, nu mu toore embo ra Muhona otja engaruvyo rOmbepo (Ovaefeses 6:11-17).

 

Omasa wa Muhona omanene nge honaparera po oviune pekepeke ye eta ondjeverero nongwizikiro. Muhona u hongorera ouripura novitjitwa vyovandu okuyenenisa ozondando zawo. Kape nakunatja kutja omazeu ngu matu tuurungire mo   yeteki pi, aruhe ngatu kare nomaundjiro wetu mu Muhona.  Omautumbe we kaama ye yanda ko. Ete matu sokukara nongamburiro kutja eye u ungura momwinyo womundu ngamwa auhe, indu kutja omundu ngo omuhona, poo omundu womahi wozonganda.

 

³Nungwari Muhona eye omuṱakame; eye me mu zeuparisa nu me mutjevere ku ingwi Omunauvi (2 Ovatesalonika 3:3). ⁸Muhona omuini ongu me ku hongorere; eye ma kara puna ove; eye me ku tjevere, nu ke nakukuesa ko; o tira nu o mumapara”( Deuteronomium 31:8). ¹⁰Orondu omatjangwa maye tja: ‘Ndjambi me ku rakizire ovaengeri ve kutja owo ve ku ṱakamise nawa’ (Luke 4:10). ⁷Muhona me ku tjevere koviwonga avihe, ma yama omuinyo woye. ⁸Muhona me ku yama, tji mo i na tji mo kotoka, nambano nga ko nga aruhe (Omapsalme 121:7–8).

 

¹⁹Okuza komukuma wokomuhuka nowokongurova auhe ma yozike ena ra Muhona, nu ma tira omasa we omanene. Eye meya otja onḓonḓu, ndji mai rauka nomasa, notja otjipukupuku (Jesaja 59:19). ¹⁷Nungwari kape notjirwise tji matji yenene okukuhihamisa; ove mo kara neziriro ku avehe mbu mave ku kuminine. Ami me yeura ovakarere vandje, nu meve pe ondjamo.” Muhona ongwa hungire (Jesaja 54:17).

 

⁴Ami mba kumba ku Muhona, neye we ndji zuvira, eye we ndji yama kozondiriro zandje azehe (Omapsalme 23:4). ⁴Ndji yama kombate ndja twirwa po ami, orondu oove omaundiro wandje (Omapsalme 31:4). ⁸Eye u yama imba mbe tjita ousemba kovakwao, nu u tjevera ondjira yaimba mbe riyameka ku ye (Omiano 2:8).

 

⁹Muhona eye omaundiro wovatatumisiwa; eye oruveze rondjamo moruveze rwoumba. ¹⁰Imba mbu mave ku tjiwa, Muhona, mave riyameka kove, orondu ove ko isa imba mbe ku paha (Omapsalme 9:9-10).  ¹⁸Mbi nouatjiri kutja omihihamo mbi tu na vyo momayuva wa nambano kavi nakusasanekwa nondjozikiro Ndjambi ndji me ketuvandururira moruveze ndu maru ya (Ovaroma 8:18).

 

¹¹⁴Oove omaundiro nondjamo yandje; nami mbi riyameka komambo woye (Omapsalme 119:114). ¹¹Nungwari avehe mbe nomaundiro move, ngave yoroke, aruhe nga ve imbure nondjoroka. Yama avehe mbe ku suvera kokutja mena roye ve kare nondjoroka move (Omapsalme 5: 11).

 

¹⁰Muhona ma tja nai: “Viwaṋa, purateneye ku ami, nu mu kazuvarise omambo wandje komakoverwa hi wokokure. Ami mba rimba otjiwaṋa tjandje Israel, nungwari me tji woronganisa, nu me tji risa otja omurise tje risa ozonyanda ze (Jeremia 31:10).

 

¹Imba mbe riyameka ku Muhona mave sana nondundu Sion, ndji ha teratera nu ndji hi na maai runduruka. ²Otja ozondundu punga aza kondoroka Jerusalem, Muhona opunga e tjevera otjiwaṋa tje, nambano nga ko nga aruhe. ³Omunauvi ke nakuhonaparera ko ehi rovasemba aruhe kokutja ovasemba ave ha rundapara. ⁴Muhona, tjita ouwa ku imba ovawa, ku imba mbe nonḓuviro komatwako woye! ⁵Nungwari imba mbe twara ondjira yoposyo, Muhona nge ve yandeke puna imba ovatjite wouvi (Omapsalme 125:1-5).​​​