¹¹“Amase, nē mîmās hîa ta nētsē ra mîmā dus ge sadu ǃaroma karosa tamas ka io sado xu ǃnū tama hâ. ¹²ǀHommi ǃnâ hâ tama, î du tā mî: ‘Tari-e sada ǃaroma ǀhommi ǁga nî ǂharo, î da ǁîsa hōbasen tsî ǁîsa ǁnâu tsî ǁnâuǀnam ǁkhā?’* ¹³ǁKhātis ge ǁîsa hurib nauǀkhāb ai sī hâ tama, î du tā mî: ‘Hurib nauǀkhāb ai da nî ǃgâu, î da ǁîsa hōbasen tsî ǁîsa ǁnâu tsî ǁnâuǀnam ǁkhā?’ ¹⁴Hî-î, kaise ǀgūse nēpa sadu tawa hâ; hoaǁae du ra ǃhoa tsî sadu ǂgaob ǃnâ hâ, xuige ǁîsa ǁnâuǀnam. ¹⁹ǀHommi tsî ǃhūbaib tsîkha ta ge nētsē ra ǂgai sadu ǃoagu ta ge ûib tsî ǁōb, tsî ǀkhaeb tsî ǀâxareb tsîga mâi-aiǃâ ǃkhaisa kha nî ǀhûǀguitimîse. 20ǃKhūb sadu Eloba ǀnam, ǁîba ǁnâuǀnam, î ǁîb ǃoa ǂgomǂgomsa, o du ge sadu tsî sadu surib tsîna ǃKhūb ge sadu aboxagu Abrahammi, Isaki tsî Jakob tsîga mîmâiba ǃhūb ǃnâ nî ûi.” (Deuteronomium 30:11-14 & 19-20 KKG20)

 

Nausa da ge ǂhanu-e ūhâ tama hâ. Xawe da ge ǁhûis ǃnorasasiba ūhâ.²¹Tsîb ge Eliaba ǁîn hoan aiǃâ sī mâ tsî “Mâǁaeb kōse du kha nî ǀgamǂâixa? ǃKhūb nî Elos kao, ǁnâi ǁîba sao; tsî Baali nî ǁîs karao, ǁnâi ǁîba sao” ti ge mî, xawes ge ǁaesa xū-i xare-e ǃeream bi tama ge i.(1 Gao-aogu 18:21 KKG20). ¹⁵ǃKhūba du ga ǃoaba ǂgao tama i, o nētsē mîǁgui tari-e du ra ǃoaba ǂgaosa, sadu aboxan Mesopotamiab ǃnâ gere ǀgoreǀî elogu tamas ka io Amorǁîn, ǁîn di ǃhūb ǃnâ du ǁan hân di elogu kas hoasa. Xawe tita tsî ti omaris xasa, sida ge ǃKhūba nî ǃoaba.”  (Josuab 24:15 KKG20).

 

³Elob ge mā te ǀkhommi ǃaroma ta ge sadu ǁaegu hâ-i hoa-e ra mîba, î-i ta ǁî-aitsama ǃgôasensa ǃnāǃnā. Xawe mâ-i hoa-e i Elob ge mā-i ǂgoms di ǀnōba ǃoa, ǂuru ǂâiǀgaub ai ǁî-aitsama ǀgoraǃgâsen. ⁴ǀGui soros ǃnâ da ǂgui uniǁaede ūhâ xui-aos ge mâs hoasa ǁîs di sîsenna ra dī. *⁵ǁNās ǁkhās xase da ge ǂguida a xawe Xristub* ǃnâ a ǀgui soro tsî mâ-i hoa-e nau-i di uniǁae. ⁶Sada ge gagasi māde ūhâ, Elob mā da hâ ǀkhommi ǃoa ǃkharagade. Kēbosis di mās kao, a da ǂgoms di ǀnōb hîa da ūhâb ǃoa sîsenū. ⁷ǃOaba ra-e a i ǃoaba. Tsî ǁkhāǁkhā ra-e a i ǁkhāǁkhā. ⁸Nau-i ǂgaoǂgaoǃnâs di māsa ūhâ-e, a i ǁnāti dī. Māǂgaoxa khoe-e a i ǁnāsa māsenxase dī. ǁKhāsiba ūhâ-i hoa-e a i ôasa. Tsî nauna ra ǀkhomxaǂgao-i hoa-e a i ǁnāsa ǃgâiaǂgaob ǃnâ dī (Romeǁîn 12:3-8 KKG20).

 

Gagasi mādi ge ǀguiǃgupuse a Elo hîa ǂgomǂgomsa Xristeǁîna ra ǀgaiǀgaide, ǁÎb dī da nîse ǂgaiba da hâna da nî dīse. ²Ab ǀkhommi tsî ǂkhîba sado ǂguiǂguibahe, sadu di ǂans Elob tsî Jesub sada ǃKhūb ǃnâ du ūhâs ǃnâ-u.3ǁÎb di elosi ǀgaib ge hoaraga xūn hîa da ûib tsî elosib ǃoa ǂhâ hân hoana ge ǀkhae da. ǁNāb, ǁîb di ǂkhaisib tsî îǂhôasib ǀkha ge ǂgai daba sada di ǂans ǃnâ-u. 4ǁÎna xub ge sada hoan xa kai tsî ǃgomǀgausa ǀkhaegu hîab ge mîmâiga ge mā. ǁÎn ǃnâ-u du nî elosi ǂūsib ǃnâ amǃnâxa ǁkhā tsî turaga xu hâ ǂkhabasib, ǃhūbaib ǃnâ hâba ǁhâxūse (2 Petrub 1:2-4 KKG20).

 

Ab Eloba ǀkhomma mā du re î du ǁnâuǃā ǁkhā, ǁÎb ǂgaob hoaragada ǃaroma ra ǂâiǂhansen ǃkhaisa. Sada ge ǃgâi tama hâ; ǀkharas ǀguisa da ge ī, ǃnâb ra ǃkhaenaba īǂam xui-ao. ǃGamǃgamsen re, ǃgamǃgamsens a gaosi ǂūsi, tsî ǀgaiba ra ǀguitikō kai xuige.

 

ǀGaib tsî ǁkhāsibats ge ǃgamǃgamsens ose a sîsenǂui ǁoa. ǁÎb ge ǃanu ǀguitikōsiba sada ai ra ǂnûi, Gaosib ǃnâ da nî sîsen, khoena tsûtsû tamase xawe nî ǃkhōsana ǃnora kaise, în ǃkhōsisa xu ǂoaxa, Elob ôagu di ǃnorasasib ǃoa.

 

ǃAnu Gagab di mādi ge ‘hoaraga xūn hîa da ǂhâba hân’ ǁÎb di ǀapes, sada ûigu ǃaromab ūhâsa sīǃnâs ǃaromadi di ǃâ. Mâ khoe-i hoa-i ge mādi ǃnâ a sîsen ǁkhā, Jesub Xristub tsî ǁÎb di gaosib ǃhūbaib ai hâba ǂhaiǂhais ǃaroma. Hoaraga khoen ga nēsisa sîsenǀhao, on ge kai xūna Elob gaosib ǃaroma a sīǃnâhe ǁkhā! ⁴ǂGui ǃkharaga gagasi mādi ge hâ, xawe di ge ǁkhā Gagaba xu ra hā. ⁵ǃKharagaǃnâgu gagasi mādi ǃKhūba ǃoabas didi hâ, xawe di ge ǁkhā ǃKhūba xu ra hā. ⁶Sîsenǂuigu a ǃkharaga, xaweb ge a ǁkhā Elo, hoa xūna hoa khoen ǃnâ ra sîsenna. ⁷Mâ-i hoa-i ge Gagab di ǂhaiǂhaisa hoan di ǃgâib ǃoa ra māhe. ⁸ǀGui-i ge gā-ai mîde ǃhoas di ǁkhāsiba ra māhe tsî nau-e ǂans di mîsa, xawe ǁkhā Gagaba xu. ⁹ǀNî-e ǂgoms di māsa tsî nau-e ǂgauǂgaus di māde, ǁkhā Gagaba xu. ¹⁰ǀGui-e buruxa sîsenga dīs di ǀgaiba, nau-e kēbosisa, ǀnî-e ǃgâi tsî tsū gagadi ǁaegu ǀgoras māsa, nau-e ǃkharaga gowagu di ǂansa tsî ǀnî-e gowaga ǁguiǃāsa. ¹¹ǀGui Gagab ǀguib ge hâ, ǁkhā Gagab hîa nē xūn hoana ra sîsenni, mâ-i hoa-e ǁîb ra ǂgao khami ra māba (1 Korinteǁîn 12:4-11 KKG20).

 

 

Gā-aisib:

²⁰-²²Gā-aisiba mâpa xub ra hā? ǁNâuǃāba mâ ǃkhais aib ǁan hâ? Hoaraga ûitsama kurusaben mûde xu a sâusa, tsî ǁkhāti ǀhomanirona xus tsîna a sâusa. ǁŌhân Hâǃkhaib tsî ǁōb tsîkha ge ra mî: ‘ǁÎs xa ra ǃhoahe ǂhôa-e khom ge aitsama ge ǁnâu.’  ²³-²⁸“Elob ǀguib ge gā-aisib ǁga garu daoba a ǂan tsî ǁîs mâpa ǁan hâ ǃkhais tsîna.24ǁÎb ge ǃhūbaib di ǀamdi kōse ra kōsī tsî ǀhommi ǃnaka hâ xūn hoana ra mû. Elob ga ǂoab di ǁkhāsiba a mîǁguio tsî ǁgamga a ǀnōǂuio; ǀnanub ǃaromab ga ǁgaraga a ǁguio, tsî ǁkhōǁkhōsa ǃgurub daoba a ǁgauǂuio; ob ge Eloba gā-aisiba mû tsî ǁîs ǁkhāsib xa ge mîmâi; ǁîb ge ǁîsa ǃgaoǃgao tsî ge ǁapoǁapo.” Elob ge khoen ǃoa ge mî: “Amase, ǃKhūba ǃaoǃgâs ge a gā-aisi; ǂkhababa xu ǂgae-oasens ge ǁnâuǃāba ūhâsa.” (Job 28:20-28 KKG20).

 

Gā-aisib ge a Eloba xu hâ mā hîa ǁhûis tsî da nî ǂgaeǂguisa Elob ǂâis ǃoa māse ra ǁkhā kai da. Xūna da ǁîb mûǂgāǀgauba xu nî ǁnâuǃā, amaba mûǂan tsî nē amaba ū tsî ǁÎba ǂkhaiǂkhais ǃoa sîsenūs ǃnâs ge nēsa ra hui da.  ⁵Xawe sadu di ǀgui-i ga gā-aisiba ǂhâbao, a i Elob hîa māǂgaoxase tsî ǀkhomxaǃnâse hoana ra māb ǃoa ǀgore, o i ge nî ǃkhōǃoa. (Jakobub 1:5 KKG20).  ⁷Gā-aisib ge a ǂguro, ǁnā-amaga ǁîba hōbasen. Tare-i ǀgui-ets ga ôa xawe, ǁnâuǃāba hōbasen. (ǂKhoamîdi 4:7 KKG20). ¹⁷Xawe ǀgapiseba xu hâ gā-aisib ge ǂguro ǃkhais ai ǃanu, ǂkhîxaǃnâ, tsauraǃnâ, khoexaǃnâ, ǀkhomxaǃnâ tsî ǃgâidīgu xa ǀoa hâ, ǀgora-e ūhâ tama hâ tsî a hînaoǃnâ. (Jakobub 3:17 KKG20).

 

ǃKhūba ǃaos ge a hūs di ǃuru, gā-aisib disa. Gā-aisis ge ǃhūbaib ǃnâ hōhe tama hâ, xawe mâ xū-i ǃhūbaib ai hâ-i hoa-i ǃnâ-ub ge Elob gā-aisiba ǁgauǂui, Elob gā-aisib hîa sada ǂâidi xa a ǁnâuǃāhe ǁoaba. Gā-aisib ge gagasi ǃgaoǃgaob hîa ǃKhūba ǃaos ǀkha ra tsoatsoa tsî ǁnâuǃās ǃnâ-u ra ǁgauǂuiheb, ǂkhababa xub a ǁhâ ǁkhaba ūhâ. ǃKhūba ǃaos ǃnâ-ub ge gā-aisib ǁnâuǃās tamas ka io mûǂgās tsî ǂansa ra hā.   ⁷ǃKhūba  ǃaoǃgâs ge ǂans di tsoatsoasa. Gâren ǀguin ge gā-aisib tsî ǁgauǃnâs tsîra ra ǃharaxū (ǂKhoamîdi 1:7 KKG20). Psalmdi 111:10 KKG20 ge ra mî: ǃKhūba ǃaoǃgâba ūhâbas ge a gā-aisib di tsoatsoa; ǃgâise ra dīn hoan ge ǃgâi ǁnâuǃāba ūhâ. ǁÎb di koas ge ǀamose ra hâ. ¹⁰ǃKhūba  ǃaoǃgâs ge ǂans di tsoatsoasa tsî ǃAnub di ǂans ge ǁnâuǃāba hōsa. (ǂKhoamîdi 9:10 KKG20).

 

Khoesi gā-aisib ge hoaraga ǃereamde ūhâ tama hâ. ǂAns tsî ǁkhāǁkhāsens ge ǁîn di ǀnōba ūhâ. Ûiba ǁnâǃās ǃaroma da ge gā-aisib, Elob di Mîs sada ǃoa hâs ǃnâ ǀgui a hōhe ǁkhāba ǂhâba hâ — ǁnās ge Elobmîsa. Elob nî hoaraga xūn dī da rana ǀgopeǀnō ǃkhaisa da ga mûǂan, o da ge gā-aise ûi, Elob mâ ǁaeb hoaba sada ǀkha hâ ǃkhaisa ǂâihō tsî ǁÎb ǁgaraga nî ǁnâuǀnam. Elob gā-aisiba da ge ǁÎba da ga ǁnâuǀnam o ǀgui a hō ǁkhā.

 

Gā-aisib ge marioǃnâ. ¹⁵ǂOaǂamsa ǃhuniǀurib ǀkha a ǁamaǃkhunihe ǁoa tsî ǁîs di ǁkhāsib ge ǀhaiǀurib ǀkha a ǀgopeǀnōhe ǁoa. (Job 28:15). ¹⁶Gā-aisiba ūhâs ge ǃhuniǀurib xa a ǃgâi; ǁnâuǃāba ūhâs ge ǀhaiǀuriba ūhâs xa a ǃgâi. (ǂKhoamîdi 16:16 KKG20).  ¹²Gā-aisiba sâus ge mari-e sâus ǁkhās khami ī. Gā-aisib ra sâu xui-ao, nēs ge a ǂans di aiǂhanu. (Aoǁnâ-aob 7:12 KKG20). ¹³Tari-e sadu ǃnâ gā-ai tsî ǁnâuǃāxa? A i ǁî-i di ǃgâi tanisens tsî sîsengu hîa ǃgamǃgamsens tsî gā-aisib xa ra ǃkhō-amgu ǃnâ-u ǁgauǂui. (Jakobub 3:13 KKG20).

 

¹⁰Sîsenūhe ra ǃōs ga khoe-i xas ǀāǀāhe tama xui-ao a ǂubu, ots ge ǃnāsa ǀgaiba nî sîsenū, xawe gā-aisib ge khoe-e ra aiǃgû kai (Aoǁnâ-aob 10:10 KKG20).

 

ǂGomoǃnâ ǃhūbaib ǃnâ ûis ǃaromab ge gā-aisiba a ǂhâbasa.  ǃNāsa ǃâb âb Xristeǁîn ǃoagu ǃgâi tamab ǃnâ da ge gā-aisiba a ǁgauǂui ǁkhā, ǁnān hîa ama tsî ǃgâina ǃgôas ǀkha tsî ǂhanu tama xūn ǃoagu mâs ǀkha. ǁÎs a ǂhâǂhâsa kaiǀoas ǃnâ ǃharos ge ǃgâin tsî tsūn ǁaegu nî ǀgorasa dīse ǁkhāǁkhāsensa. ELob ge nēs ǃnâ, ǁÎb mîs, ǁÎb Gagab tsî Xristub soros ǃnâ-u nî hui da, gā-ai tsî ǁkhāǁkhāsensa ūhâ khoe-i supuse a gāhe ǁkhā xui-ao.   ¹⁹Nē ǃhūbaib di gā-aisib Elob tawa gâsib ase ī xuige. Xoas ra mî xui-ao: “Gā-ainab ra ǁîn di gāxaǃnâsib ǃnâ ǃkhō” (1 Korinteǁîn 3:19 KKG20). ⁵Sa ǂgaob hoab ǀkha ǃKhūba  ǂgomaiǂnûi, î tā sa ǁnâuǃāb ai ǂgomǃgâ (ǂKhoamîdi 3:5 KKG20). ¹⁵⁻¹⁷Tā ǃhūbaib tsî ǁîb ǃnâ hâ xūna ǀnam. ǁNā khoe-i hîa ǃhūbaiba ǀnam-i ǃnâb ǁGûb di ǀnamma ǀkhai xuige. Hoa xūn ǃhūbaib ai hân; sorosa xu hâ turagu, mûdi ra mû tsî turan tsî ǁî-i ūhâxūn di ǂnīsasib; nēn hoan ge ǁGûba xu hâ tama xawe ǃhūbaiba xu hâ. Tsî gu ge ǃhūbaib tsî ǁîb di turaga ra ǃgû-ī, xawe ǁnā-i hîa Elob ǂâisa ra dī-i ge ǀamos kōse ra hâhâ.  (1 Johaneb 2:15-17 KKG20).

 

 

ǂAns:

¹⁵ǁNâuǃāxa khoe-i ge ǂansa hōs ǃaroma ra ǁkhāǁkhāsen, gā-ai khoe-i ge ǂansa ra ôa (ǂKhoamîdi 18:15 KKG20).

 

²ǁÎn nî ǂgaogu ân ǃnâ ǂgaoǂgaoǃnâhe tsî ǀnammi ǃnâ ǀhaoǀhaohese. Elob di ǂganǃgâsasib, Xristuba ǀoasase ǂans di ǃkhūsib tsîna xu ra ǀkhâuǂoaxa ǁnâuǃāban nî hōse. ǁÎb ǃnâb hoaraga ǁuib gā-aisib tsî ǂans diba a sâusaba (Koloseǁîn 2:2-3 KKG20).

 

Elob xa ǂans ge ǁîs a îbe ǂhâǂhâsa xū, khoe-i a ūhâ ǁkhāsa. Xawe a ǁkhāti ǃgāsa ǃkhais ge Elob tsî ǁîb di hâs xa ǂans ǀguis ǂâu tama hâsa; Elob xa ǂans ge ǃgam ǃgôaǃgâs sada ǁÎb ǀkha ūhâ ǃhûǁares disa nî ūǂgā.  ǂAns ge Eloba xu hâ mā hîa sada ǀoasase gagasi xūn tamas ka io mâsiga ǁnâuǃāsa ǁkhāsiba ra mā dasa. ⁶ǃKhūb ge gā-aisiba ra māba; ǁîb amsa xūs ge ǂans tsî ǁnâuǃāb tsîra ra ǂoaxasa (ǂKhoamîdi 2:6 KKG20). ǂAns ge a Elob di, ǁîb xa ra māhese, tsî ǁnān ǁÎba ra ǃaoǃgân ge ǁnāsa nî ǃkhōǃoa. ǁÎb ge ǂans di māsa ǁîb di ǀnōheǁoasa ǃkhaib ǂans diba xu ra mā, ǁÎb di ǂans ge ǀnōheǁoasas ǀguisa hî tama xawe a dīǀoaǀoasa. ³³Mâtikōsen Elob di ǃkhūsib, gā-aisib tsî ǂans tsîna a ǃgam. ǁÎb ga ǀgoraǃgâ, xawe tari-e ǁnāsa a ôaǃnâ ǁkhā? Tamas ka io tari-e ǁîb daoga ǂanǂui ǁkhā? (Romeǁîn 11:33 KKG20)

 

¹Tsî ǁgôa-eloǁguibadi xa da ge hoada xūna ǀgoras di ǂansa da ūhâ ǃkhaisa a ǂan. Nē ǂans ge ǀgapiǂâixasiba ra mā, xawe ǀnammi ge ra omkhâi. ²Khoe-i ga xū-e i a ǂan ti ǂâi, xawe-i ge noxopa ǂan i nî khami ǂan tama hâ. ³Xawe Eloba ga ǀnam khoe-i ge ǁîb xa a ǂanhe (1 Korinteǁîn 8:1-3 KKG20).

 

ǀArosen Eloba ǂans ǃnâs ge Xristesi kaiǀoas di ǃâ tsî hoa Xristeǁîn xa nî hōǃâhe xūse ī ¹⁸xawe ǀomkhâi sada ǃKhūb tsî ǃGâiǃōdī-aob, Jesub Xristub di ǀkhommi tsî ǂans tsîra ǃnâ. Ab ǁîba ǂkhaisiba ūhâ nēsi tsî ǀamosib tsēs kōse. Amen. (2 Petrub 3:18 KKG20).

​

²⁰Timoteutse, ǃkhōǀgara ǂgomǃgâhets gen hoana. ǂGōxū ǁau tsî gâre ǃhoa-ain sa mâǃoa-aon ǂhanu tamase “ǂans” ti ra ǂgaina. ²¹ǀNîn ge ǁnā ǀgaub ai gā-aidīsen tsî ǂgomsa xu ge kāǁō. Ab Elob di ǀkhomma sadu hoadu ǀkha hâ. (1 Timoteub 6:20-21 KKG20)

 

 

ǂGoms:

¹ǂGom da ka, o da ge ǃâubasen da ra xūn di ǁaposasib tsî mû tama da hâ xūn di ǂanǁaposa ūhâ. ²ǁÎn di ǂgomsa xus ge sada aboxan ge Elob xa ūǃoahesa. ³ǂGomsa xus ge ǃhūbaib ge Elob di mîsa xu kuruhe ǃkhaisa da ra ǁnâuǃāsa, mû da ran ge mû tama da hâna xu ǀkhī ǃkhaisa. ⁶ǂGoms ose i ge a īǁoa Eloba ǃgâiǃgâiǂgaosa. Elob kōse ra ǀgūǀgūsen-i ge nî ǂgom, ǁîb ûi hâ tsîb ǁîba ǁnān ǁîba ra ôana ra mādawa-am ǃkhaisa  (Hebreǁîn 11:1-3 & 6 KKG20)

 

ǂGoms ge a Eloba xu hâ mā hîa Eloba da nî ǂgomǃgâ tsî da nauna Eloba ǂgomǃgâsa nî ǂgaoǂgaoǃnâs ǃoa ra ǁkhā kai da, mâti ǀguib ga mâsiba ī xawe. ǂGoms ge a hoaraga xūn, dī da ran di ǃgaoǃgao. ⁸ǀKhomma xu du ge ǂgoms ǃnâ-u ǃgâiǃō kaihe xui-ao, tsî nēsa sadu ǃoaǂuisa xu tama, xawe Elob di mās ase. ⁹ǁKhātis ge nēsa sadu sîsenga xu hâ tama, ǁnā-amaga i ge ǀgui-i tsîna a koasen ǁoa. (Efeseǁîn 2:8-9 KKG20). ¹⁴Ti ǀnam ǃgâsado, tare harebe-e hâ, Xristeǁî-i ga “Tita ge ǂgomsabeta” ti mî, xawe i ga ǃgâi sîsenga ūhâ tama io. ǁNāti ī ǂgomsa, khoe-e ǃgâiǃō kai ǁkhās a? (Jakobub 2:14 KKG20).

 

ǂGoms ge ǀgui ǃurus tsî ǂâis nî ǂnûi-aihe ǃkhaiba ūhâ — Mîs Elob disa. ¹⁷ǂGoms ge ǂhôasa ǁnâusa xu hâ tsîs ge ǂhôasa Xristuba aoǁnâs ǃnâ-u ra ǁnâuhe (Romeǁîn 10:17 KKG20). ¹⁷ǂGoms ge ǂhôasa ǁnâusa xu hâ tsîs ge ǂhôasa Xristuba aoǁnâs ǃnâ-u ra ǁnâuhe.  (Romeǁîn 10:17 KKG20).

 

⁷ǂGomsa xu da ge ûi hâ, xawe mû da rana xus ose (2 Korinteǁîn 5:7 KKG20). ⁸⁻⁹Jesuba du ge mû bi tama du ge hâ i xawe a ǀnam, tsî du ge nēsi mû bi tama du hâ xawe ǁîb ǃnâ ǂgom tsî ǃhoaǂuiheǁoa ǂkhaisa ǃgâiaǂgaob ǀkha ra dâ. 9 Sadu ge ǂgoms di ǂâibasensa nî ǃkhōǃoa, sadu ǀomdi ǃgâiǃōsiba ra hōbasenǃâ (1 Petrub 1:8-9 KKG20). ⁴⁰Ob ge Jesuba ǁîs ǃoa ge mî: “Mîba si tama ta hâ, tita ǃnâs ga ǂgom os nî Elob ǂkhaisiba mû ǃkhaisa?” (Johaneb11:40 KKG20). ǂGom da ge nî mû ǁoa da a hîa, mûts ka os ǂgomts nî ǃkhaisa ǂhâbasa tama hâ amaga — amabes ǃnâ a ǀnai ǃgāsa tsîs ǂgomsa ǂhâbasa tama.

 

ǂGoms ge ǁkhāsib ai ra ǀnōhe, ǂguisib ais ose. ²⁰Ob ge Jesuba ge ǃeream: “ǂGoms âgo a ǂkhari xui-aos ge. Amase ta ra mîba go, mostardǃkhomro-i* khami ǂkhari ǂgomsa go ga ūhâ tsî nē ǃhommi ǃoa ‘Nēpa xu nauǀî gon’ ti mî ob nî gonbēsa. Elob ǃnâts ga ǂgom, ots ge xū-i hoa-e a dī ǁkhā” (Mateub 17:20 KKG20). ³²ǁÎ-i ge ǃhūbaib ai hâ ǃkhomn hoan xa a ǂkhari, xawe i ge ǀomkhâitoa-i kao, nau ǃhanasa xūn hoan ǃgâ-ai ra kai. ǁKhāti i ge ǂhonagu, ǂâu hâ kaiba ūhâga ra ǀhōǂui tsîn ge ǀhomanirona ǁnā ǁnâugu ǃnâ ra om” (Mateub 13:32 KKG20).

 

Sada ǂgoms ge nî ǃâihe. ǃÂihe tama ǃhuniǀurib ǁkhāsiba ūhâ tamas ǁkhās khamis ge ǃâihe tama ǂgomsa Elob aiǃâ ǁkhāsi-e ūhâ tama hâ. ²⁻⁴Ti ǃgâsado, ǂguiǃnâgu ǃâitsâ-ain ga hāǂam duo, as nēsa ǃgâiaǂgaob ase ī re. 3Sadu ǂgoms di ǃâitsâhes ge mâǁaposa ra ūhā. ǁNā-amaga as sadu mâǁaposa dīǀoaǀoasa, î du dīǀoaǀoasase ī, xū-i xare-e tôasi tamase (Jakobub 1:2-4 KKG20).  ¹ǁNā-amaga, ǃanu ǃgâsadu hîa ǀhomsi ǂgais ǃnâ ra amǃnâxado, Jesub, Apostel tsî ǀGapipristeri* sada ra ǁguiǁnâ ǂgoms diba ǂōrisase ǃgaoǃgâ re. (Hebreǁîn 3:1 KKG20); ¹⁴amaga a da ǂgoms hîa da ra ǁguiǁnâsa ǃkhōǀgaipe (Hebreǁîn 4:14 KKG20) ²³A da ǁguiǁnâ da ra ǃâubasens ai îganǀgē tamase ǃkhōǀgaipe, Elob mîmâi geb a ǂgomǂgomsa xuige (Hebreǁîn 10:23 KKG20).

 

 

ǂGauǂgaus:

⁵Xawe ǁîb ge sada ǁoren ǃaroma ge tsuihe, ǁîb ge sada tsūdīn ǃaroma ge ǂnauhe. ǁÎb di ǁkharab ge sada ge ǂgauǂgau tsî ǁîb ǂnauǀhapidi ge ge ǂuruǂuru da (Jesajab 53:5 KKG20).

 

¹⁷Tita ge sasa ǁkhawa nî ǂgauǂgau,sa ǀhapide ta ge nî ǂgauǂgau, sa khākhoen ga sasa, Sions, ǂharahe hâs khoe-i xare-i xa ǁae-ūhe tamas ti ǂgai xawe, tib ge ǃKhūba ra mî (Jeremiab 30:17 KKG20).

 

²⁴ǁÎb, sada ǁorena ǁîb di soros ǂûs ǃnâ ǃgâuhaib ai ge taniǃapab, ǁorena ǁōǁnâ hâse da nî ǂhanu-aisiba ûibaga. ǁÎb di ǀhapina xu da ge ǂgauba (1 Petrub 2:24 KKG2).

 

ǂGauǂgaus ge a ǀnōheǁoasa mā; Elob di ǀgaib ǂgauǂgaus diba ǀaesen hâ, tamas ka io tsû hâ khoe-i tamas ka io tsâ ra khoe-e ǂgauǂgaus ǃaroma sîsenūs ge. ǂGauǂgaus ge mās hîa ǂgoms ǃnâ-u ra ǃkhōǃoahesa. Markub 5: 25-34 ǃnâ da ge ǀaoǂnâba ge 12kuriga ūhâ i taras xa ra khomai. ǁÎs ge “Anaǂamsarab âb ǀguiba ta ga tsâǀkhāo, o ta ge nî ǂgau” ti ge mî.ǁÎs ge anaǂamsarab âba ge tsâǀkhā ǃommi âs ǀkha, xawe ǂgoms âs ge ǁÎba ge tsâǀkha tsîb ge ǂgauǂgaus ǀgaiba ǁnā ǀgaus ai ge sîǂuihe.³⁰ǀGaib ǁîb ǃnâ ge hâ ibab ge ǂoaǃnâ ǃkhaisab ge hōǃâ, ob ge Jesuba ǂnubis ǁga dabasen tsî “Tari-e kha ti saraba go tsâǀkhā?” ti ge dî. (Markub 5:30 KKG20). ³⁴Ob ge Jesuba ge mîǀî si: “Ti ôase, sa ǂgoms ge go ǂuruǂuru si xuige ǃKhūb di ǂkhîb ǃnâ ǃgû re. Sas ge sa ǀaeba xu go ǂuru xuige” (Markub 5:34 KKG20).

 

ǂGauǂgaus ge Elob domma ǁnâu tsî ǁnâuǀnams ǃnâ hâ.²⁶ǁÎb ge ge mî: “ǃGâise du ga ǃKhūb sadu Elob mûǁae a ǂhanu xūna dī tsî mîmādi âba hoaǁae ǃkhōǀgaipe, o ta ge ǀguis khama i ǁkhara-ai-i Egipteǁîn ǂama ta ge hā kai hâ i-i tsîn ǀkha ǁkhara du tide. Tita ge ǃKhūta sado ra ǂuruǂuru ta” (Eksodus 15:26 KKG20). Rapha ti hâ mîs ge ǂgauǂgaus, ǁkhawa dī-unus tamas ka io ǃnaba ti ra ǂâibasen. Jehova Rapha ti mîs ge “ǂGauǂgau ra ǃKhūb” ti ra ǂâibasen. Jehova Raphas ge Elob di ǂgui ǀondi di ǀguis hîa ǀguri hâ sîsenǀgaub ǁîb ǂūsigu diba ra mâi-aiǃâba — ǁnās ge ǂgauǂgausa.

 

ǃHobasens ge ǂgauǂgausa ra hā-ū.  ¹“Hā, î da ǃKhūb ǃoa oa re, ǁîb ge sada go ǀkhauǃā tsîb ge sada nî ǂuruǂuru; ǁîb ge sada go ǂnau, tsîb ge sada nî ǃgae-aiba (Hosea 6:1 KKG20). ¹⁴Tita ge ǁîsa ǂgausib tsî ǂurusib tsîkha nî hā-ūba, tsî ta ge ǁîna ǂgau tsî hâhâ ra ǂkhîb tsî ǃgâiǃgâb tsîkha nî ǂhaiǂhaiba. (2 Kroniks 7:14).

 

Mîs ǃnâb ge Jesuba ǃnāsase gere ǂgauǂgau, tsî nētsēb ge ǃKhūba noxopa a ǁNā, ǂgauǂgau raba — sada ge khoe-e a ǂgauǂgau ǁoa.  ¹⁷“ǁÎb ge aitsama sada ǂkhabusasiga ū tsî sada ǀaesenga ge ūbē.” (Mateub 8:17 KKG20). ⁶Tita ge ǁîsa ǂgausib tsî ǂurusib tsîkha nî hā-ūba, tsî ta ge ǁîna ǂgau tsî hâhâ ra ǂkhîb tsî ǃgâiǃgâb tsîkha nî ǂhaiǂhaiba (Jeremiab 33:6 KKG20). ǃKhūb di ǂgauǂgau ra ǀgaib ge sada, ǀaesen hân di sorodi tsî ǁnān tsâ rana ra aoǁnâba da ǃnâ-u ra sîsen.  ¹⁴Sada xu i ga ǀgui khoe-e ǀaesen, a i kerkheb di ǂnomdomna* ǂgai tsî ǃKhūb di ǀons ǃnâ ǀgorebahe tsî ǀkhera-oli-i ǀkha ǂkhauhe. ¹⁵Tsî ǁîn di ǀgores ǂgomsa xu hâs ge ǀae hâna nî ǂgauǂgau; tsîb ge ǃKhūba ǁîna hoaragase nî ǂgauǂgau. Tsî i ga ǁore hâ, o-i ge nî ǀûbahe. ¹⁶ǁNā-amaga ǁîǃnābe ǁoren âdo ǁguiǁnâ, î ǀgorebagu ǂuru ǁkhā du nîse. ǀGores ǂhanu-ai khoe-i dis ge kai tsî ǀgaisa sîsenǂuiba ūhâ (Jakobub 5:14-16 KKG20).

 

³ǁÎb ge ǁnāb ǂkhū hâ ǂgaogu â-ina ǂgauǂgau tsî ǀhapin âna ra ǃgae-aiba.  (Psalmdi 147:3 KKG20). ²ǃKhūba koa re ti ǀomse, î ǃgâidīgu âb xawega tā ǀuru re. ³Sa dīsān hoana ra ǀûba tsib, sa ǀaesengu hoaga ra ǂuruǂuruba (Psalmdi 103:2-3 KKG20). Elob di ǂgauǂgau ra tsâǀkhās ge sorosi ǀaesenain ǃgâ-ai ra sîsen. Elob ǂgauǂgau, tsî sada sorosise tsî gagasise ra dī-unuba.

 

 

Buruxa sîsengu:

²²“O Israelǁîdo ǃgâise ǃgâ re! Elob ge sado Jesub Nasaretǁîb xa ge ǃkhō-amba, buruxa sîsengu, dīgu tsî saodi hîab ǁîb ǃnâ-u gere dīn ǀkha, sadu hoadu ǂan khami. (ǃNaeǃkhaidi 2:22 KKG20).

 

Buruxa sîsengu di mās ge ǃanu sîsenni, Elob dib hîa khoesi ǁnâuǃāba ra īǂam tsî buruxasiba ǂgaoǂgaoǃnâ, Elob kaisiba ǁgauǂui, Elob di Mîs ǁkhāsiba mā tsî ra khoena ǂanǃgâ kai Elob nē ǃhūbaib ai a sîsenxa. Buruxa sîsengu ge ǀō-aisa xūn ǀguri hâ ǀgaib di sîsenni Elob dib ǀkha ǀgui a ǂgaiǀhaohe ǁkhā. Buruxa sîsenni ge ǃoa Elob xa dīhe ǁkhā, tamas ka io khoe-i ǃnâ-u a sîsenxa kaihe ǁkhā. ²⁶Ob ge Jesuba ǁîga kō tsî ge mî: “Nēs ge khoena a īǁoasaba, xawen ge hoa xūna Elob tawa a īǁkhā.” (Mateub 19:26 KKG20).

 

Jesub ge mûmûsase ǀgaib tsî sîsenni di khoeba, mîdi ǀguidi ose. Jesub ge buruxua sîsenga gere dī, ǁÎb di ǂhôasa khoena ǁapoǁapoba tsî ǁkhāǁkhāsabega ǁÎb di ama īb xa ǁkhāǁkhās ǀkha. ǂAnǁapo da ra Jesub a Elo ǃkhaisas kōse da ge ǁÎb ǀgaib tsî ǁÎb ǀnamma nî mû. Jesub ǀgaib di sîsengu ǁîb mâ khoe-i hoa-e sâu ǁkhā ǃkhaisa ra ǁgau, mâti ǀguib ga ǁî-i īgeǁaeba ī xawe. ǁÎb buruxa sîsengu ǀûbas digu ge ǂgauǂgaus, ǀoasasiba hā-ū tsî ǁnān ǁÎba ra ǂgomǃgân di ûiga ra ǀkharaǀkhara. ¹⁴Sats ge ǁnā Elots buruxa sîsenga ra dītsa; sa ǀgaibats ge ǁaedi ǃnâ ge ǂanǂan. (Psalmdi 77:14 KKG20).

 

Jesub Xristub ǃgâiǂhôasa da ra aoǁnâ hîas ge Elobmîsa nēti ra mî: ¹⁷Sao ra saodi ge ǁnān ǂgom rana nî hâǀkhā: ǁÎn ge ti ǀons ǃnâ ǁgâuaga nî ǃhaeǂui tsîn ge ǀasa gowaga nî ǃhoa. (Markub 16:17 KKG20).

 

 

Kebosis:

¹ǀNamma ǂgurose saoǃgon, î du gagasi māde ǁkhore re, ǃnāǂamsase kēbosis di māsa  (1 Korinteǁîn 14:1 KKG20).

 

Kebosis ge a ǁkhāsi ǃAnu Gagab ra ǂgomsabe-e māsa, mîdi/ ǂhôas Eloba xu hâs, ǂgomsabe-i di gā-aisib, ǁnâuǃāb tamas ka io ǁkhāǁkhāsensa xu hâ tamade/sa nî gowase. Kebosis ge sada di tama, Elob di.

 

²⁴Hoan ra kēbo hîa i ga ǂgomoǃnâ-i tamas ka io ǁnâuǃā tama-e ǂgâxa, on ge ǁî-i mâpa tsū ǃkhaisa ǁgau tsî ǁore-ao-i a ǃkhaisa ra gowadan. ²⁵O gu ge ǂganǃgâsigu ǁî-i ǂgaob diga nî ǂhai tsî-i ge ǃhonǁgoa, Eloba ǀgoreǀî tsî Elob amase sadu ǁaegu hâ ǃkhaisa nî ǁguiǁnâ (1 Korinteǁîn 14:24-25 KKG20). ǂGomsabe-i ge Elob ǀapemas di ǁkharuse a ī ǁkhā, mîdi ǂgomsabe-e xu hâ tama xawe Eloba xu hâde nî māǃkharuse. ǂÂibasens kebosis dis ge omkhâisa (ǂnubikhâis), gongonǃnâs (ǁnamas) tsî ūkhâi-ai (ǁkhaeǂgao) Elob khoenasa.

 

Hoaraga kebosi gowadi ge ǀgoraǃgâs ǃnâ mâihe ǁkhā ²⁹A gu ǀgam tamas ka io ǃnona kēbo-aoga ǃhoa, în nauna tare-i ra mîhe ǃkhaisa ǀgoraǃgâ (1 Korinteǁîn 14:29 KKG20). ¹⁹⁻²²Gagaba tā ǀari; kēboside tā ǃharaxū, xawe xūn hoana ǃâitsâ, î ǃgâina ǃkhōǀgara, mâ ǂkhabaǃnôa-i hoa-e xu ūdabasen  (1 Tesalonikaǁîn 5:19-22 KKG20).

 

Kebo-ao-i di ǃereams ge Elob di ǂhanuba xu ra ǀgora xū-i hoa-e ǃhoaǃgâ tsî dī-unusa. Elobmîs, aoǁnâdi hîa amab tsî gā-ai ǀapes ǂgomsaben dis hîa ǃkhâikhomdi ase ība dana. Mâti da bē ǁkhā Elob di mîsa xu ǃkhaisa ǁgau da ǁhā khoe-i hoa-i ge ǀkhaeb ase ī.  ⁵Gâre khoe-i ge ǁî-i îb di ǁgui-aisa ra ǃharaxū, xawe ǃkhâikhomsa ga ǁnâuǀnam khoe-i ge a gā-ai (ǂKhoamîdi 15:5 KKG20). Sada ûiga Eloba ǁnâuǀnams ǃoa ǀkharaǀkharas ge kais tsûsa ǁgaraga ǃkhōǂgā hâ. Khoen sada ǃoagu nî sada ûigu ǃnâ da ūhâ ǂkhabusasigu xa ǂhauǃnâna da ge nî ôa. ³¹Hoadu ge ǀguiǀguibes ai a kēbo ǁkhā, hoan nî ǁkhāǁkhāhe tsî ǂgaoǂgaoǃnâhese (1 Korinteǁîn 14:31 KKG20).

 

 

ǀGoras:

¹⁰Î du ǁîn a ǃgâi xūna ūǃoabasen, ǃanu tsî ǂnao-ose du Xristub di Tsēs ai nî ī (Filipeǁîn 1:10 KKG20).

 

¹²Elob di mîs ge ûitsama tsî a ǀgaisa. Tsî ǁîs ge hoaǀkhāǀāgôab ǃgâ-ai a ǀā, tsî ra ǃkhāǃganu ǀoms, gagas, uniǁaedi tsî ǂgaeb tsînas ra ǀgoraǃās kōse. Tsîs ge ǂâidi tsî mûǂgāǀgaugu ǂgaob diga ra ǀgoraǃgâ. ¹³Tsî kurusabe-i xare-i ge Elob aiǃâ ǂganǃgâsa tama hâ, xawen ge hoa xūna ǁnāb, ǁîb ai da ǃereamsa nî māb di mûǁae ǁkhowa-amsa tsî a ǂhaisa  (Hebreǁîn 4:12-13 KKG20).

 

Mîs Elob dis ge ǁîs ǂûs ǃnâ khoe-i di ǂâides ra ǀgoras xa ra ǃhoahe. ǀGoras ge ǃgâi tsî ǂōrisa ôaǃnâdi ǀkha mâtikōse i xū-e amase Eloba xu hâ ǃkhais tamas ka io ǂhauǃnâsib ǃnâ hâ ǃkhaisa ôaǃnâsa.

 

Elob di Mîs ǁkhāsiba ǀgorasa dīs ǃnâ-u ǂanǃgâ re. Hoaraga mîdi ti ams didi ge ǂhanu-aisib ǀkha hâ; ǀguis khami ī gāxaǃnâ-i tamas ka io ǀhôagaosi-i tsîn ge ǁîdi ǃnâ ǀkhai.  ⁸Ti ams di mîdi hoadi ge a ǂhanu-ai; ǂhumi-i tamas ka io ǀhôagaosi-i ge ǁîdi ǃnâ a ǀkhai. ⁹ǁNâuǃāxa khoen ǃaroma di ge ǁîde a ǃgāsa tsî ǂansa ūhân ǃaroma di ge a ǂhanu  (ǂKhoamîdi 8:8-9 KKG20).

 

ǀGorasa dīsa ôas ge hoan hîa ǂhanu-aisib ǃnâ ǃgûsa ra turana sīǃnâs ase ība. ⁹Tari-e a gā-ai, tsî nē xūna ra ǁnâuǃā? Tari-e a ǁnâuǃāxa tsî nē xūna nî ǂanǃā? ǃKhūb di daogu ge a ǂhanu-ai tsîn ge ǂhanu-ai khoena ǁîgu ǃnâ ra ǃgû, xawe ǃûǂamaon ge ǁîgu ǃnâ ra ǁnā (Hosea 14:9 KKG20). ¹²⁵Sa ǃgāta ge, xuige ǁnâuǃāba mā te re, î ta sa mîmāde ǂan ǁkhā (Psalmdi 119:125 KKG20).

 

²¹Ti ôatse, ǂuru gā-aisib tsî ǂâiǀgauba ǃkhōǀgaipe, tā kha sa ǁnâuǃāba xu ǂoa. ²²ǁÎkha ge sa ǀoms di ûib ase tsî îsase anisa karab sa ǃaos ai hâb khami ī. ²³Ots ge sa daob ai ǃnorasase nî ǃgû tsîts ge ǃnôa tide. ²⁴ǁGoeǃgûts ka ots ge ǃao tide; sâsasets nî ǁom (ǂKhoamîdi 3:21-24).

 

 

Namgu ǃnâ ǃhoas:

¹Tsî ǃAnu Gagab ǁhōǂuis di tsēsa ain ge hoaraga ǂgomsabena ǀguiba ge ǀhao hâ i. ²O i ge ǃnapetamase ǀhomma xu ǀgaisase ra ǃgom ǂoab khami ǀō-e ge hā tsî ǂnû ǃnân hâ omsa ge ǀoaǀoa. ³Tsîn ge ǀaes khami ī namga ge mû, ǀgoraǃā tsî ge ǁnāpa ge hâ i-i hoa-i ai ǂnûga. ⁴Tsîn ge ǁnātimîsi ǃAnu Gagab xa ǀoaǀoahe tsî ǃkharagaǃnâgu gowagu ǃnâ ge ǃhoatsoatsoa, Gagab xan ge ǁkhā kaihe khami (ǃNaeǃkhaidi 2:1-4 KKG20).

 

²Khoe-i hîa gagasi gowagu di māsa ūhâ-i ge khoena ǃoa ǃhoa tama hâ, xawe Elob ǃoa ra ǃhoa. Khoe-i xare-i ge ǁnâuǃā tama hâ, xawe i ge Gagab ǃnâ-u ǂganǃgâsiga ra ǃhoa. ⁴Gowagu māsa ūhâ khoe-i ge ǁî-aitsama ra ǂnubikhâisen, xawe kēbo ra-i ge kerkheba ra ǂnubikhâi. ⁵Sadu hoadu ǃhao gowagu ǃnâ nî ǃhoa ǃkhaisa ta ge ra ǁkhore, xawe ǁnās ǃgâ-ai kēbo du nîsa. Kēbo ra-i ge ǃkharaga gowagu māsa ūhâ-i ǂamai a kai, ǁnā tamas ka io i ga ǁguiǃā ǁkhāo, îb hoaraga kerkheba ǁnās ǃnâ-u ǂnubikhâihe (1 Korinteǁîn 14:2; 4-5 KKG20).

 

Grikegowab di mîs nams ti ra ǂnûiǃkhunihes ge ǃoaǃū ‘gowagu’ ti ra ǂâibasen. Namdi di mās ge sada gowa-ao-i ge tātsēs tsîna ǁkhāǁkhāsen tama hâ i gowab ǃnâ ǃhoasa ra ǁkhā kai, ǁnā gowaba ra ǃhoa khoe-e aoǁnâbas ǃoa. ⁶Xawe nēsi, ǃgâsado, sadu tawa ta ga ǃhao gowagu ǃnâ ra ǃhoase sīo, tarebe harebe-e i nî sado ūhâba, sadu ǃoa ta ga ǂhaiǂhais, ǂans, kēbosis tamas ka io ǁkhāǁkhās ǃnâ ǃhoa tama io? (1 Korinteǁîn 14:6). Namgu ǃnâ ǃhoas ge ǁnā-i Elob ǂhôasa ǁî-i gowab ǃnâ ra ǁnâu-e harebesa ūba hâ, xawe naun hîa ǁnâuǃā tamana a harebeoǃnâba, hânan ga ǂnûiǃkhunibahe tama io.

 

 

Gowaga ǁguiǃās:

¹³ǁNā-amaga a i ǁnā-i ǃhao gowagu di māsa ūhâ-e ǀgore, mî-i ra xūna ǂnûiǃkhunis di mās ǃaroma (1 Korinteǁîn 14:13 KKG20).

 

Gowaga ǁguiǃās di mās ge ǁnâuǃā tsî mîsa ǀkhara gowab ǃnâ ǃkhōǃoa tsî sa ǂhunuma gowab ǃnâ ǂnûiǃkhunis di ǁkhāsiba. ǀGuri hâ mās xawe gowagu ǃnâ ǃhoas di mās ǀkha ra ǀguipa sîsenūhe khami ra ǁgausen.

 

Nē ǃnubusib aiǂans gowa-i disa ūhâ tama is dis ge gagasi māsa ǂūsi māsa xu ra ǀgora, ǁnās ge ǁnâuǃā tsi ǂguiǃnâgu gowaga ǃhoasa.

 

ǂÂibasens ge hoan ga ǁnâuǃã tsî amab hîa ra ǃhoaheb tsî kerkheb ǂnubikhâisa xu a domdoresa. ǀGui ǃgâi harebe-i tsîna ge ǀnî khoen kerkheb dina ūhâba tama hâ i ǃkhais ge ǁnâuǃā taman hâ xū-e ǁnâusa. Nams di māsa ǁguiǃās di mās ose sîsenǂuis ge a harebeoǃnâ.  ²⁸Xawe ǁguiǃā-ao-i ga ǀkhaio, a i kerkheb ǃnâ ǃnō, a i ǁî-aitsama ǃhoabasen tsî Elob ǃoa. (1 Korinteǁîn 14:28 KKG20).

 

ǃAnu Gagab di ǂûn ge ǃAnu Gagab Xristeǁîn ûib ǃnâ hâ ǃkhais di ǁgauǁgau. ǁÎs a kai ǂâibasens ǃAnu Gagab dis ge Xristeǁî-i di ûib ǃnâ ǂgâxa tsî ǁnā ûiba ǀkharaǀkharasa. ǃAnu Gagab di sîsenni ge sada Elob īb ǃoa ǀkharaǀkharasa, ǃnāsase da ǁÎb khami nî īse. Xristeǁî-i ge tātsē ǀoasase danaose ǂoaxa tide, hoaǁae ǃAnu Gagab ǂûna ǁgauǂuis ǃnâ. Xristesi ûib ǃnâ kai ǂâibasens ge ǃAnu Gagaba mā-amsa, ob ra ǀarosen o ǁÎb ǂûna sada ûigu ǃnâ ǀarosen kaisa — tsî ǁkhāti ǃAnu Gagaba mā-amsa îb mâǃoaxa turagu ǁoreb diga dan ǁkhā. Gagab di ǂûb ge Elob di ǁkhore, mâti gu sada ûiga nî ī ǃkhaisa, tsîs ge nēsa ǃAnu Gagab di huib ǀkha a īǁkhā.

 

¹⁶ǁÎgu ǂûn ai du ge nî ǂan gu. Amase i kom ǁkhūhaisa xu draibena a ǃorahe ǁoao tsî ǀnomaǂûna ǁkhūxa haisa xu? ¹⁷Mâ ǃgâi hai-i hoa-i ge ǃgâi ǂûna ra ūǀkhī, xawe ǁgai hai-i hoa-i ge ǁgaora ǂûna ra ūǀkhī. ¹⁸ǃGâi hai-i ǁgaora ǂûna a ūǀkhī ǁoas ǁkhās khami i ge ǁgai hai-e ǃgâi ǂûna a ūǀkhī ǁoa. ¹⁹Mâ hai-i hoa-i, ǃgâi ǂûna tani tama-i ge ǁhāǂuihe tsî nî ǂhubiǂuihe.  ²⁰ǁNā-amaga gu ge ǂûn âgu ai nî ǂanhe (Mateub 7:16-20 KKG20).

 

²²Xawe Gagab di ǂûb ge: ǀNammi, ǃgâiaǂgaob tsî ǂkhîb, ǃnūǃnâxasib, khoexaǃnâsib tsî ǃgâisib, ǂgomǂgomsasib, ²³tsamtsiǃnâsib tsî ǃkhōǀgarasens tsîna. Nē xūn ǃoagu i ge ǂhanu-e a ǀkhai. ²⁴Xawe ǁnān hîa a Xristub Jesub din, ge ǁîn di sorosi turaga ge ǃgâu. ǁÎn ge dī ǂgaon gere ǂkhaba xūn tsî sorosi turagu âna ge ǀû. ²⁵Elob Gagab xa ǂgaeǂguihe hâse da ga ûio, a da Gagab ra ǂgaeǂgui da ǀgaub ai ûi re.  ²⁶A da tā koasen tamas ka io ǁîǃnābe ǂoeǂoegu tsî surigu (Galateǁîn 5:22-26 KKG20).​​​